ڊويزنل ڪمشنر حيدرآباد فياض عباسي جي صدارت هيٺ سجاول ۾ اهم اجلاس

ترقياتي اسڪيمون وقت سر مڪمل ڪيون وڃن، قيمتن تي ڪنٽرول رکيو وڃي: فياض عباسي

سجاول (ڊ ر) ڊويزنل ڪمشنر حيدرآباد فياض حسين عباسي جي صدارت هيٺ دربار هال سجاول ۾ اهم اجلاس منعقد ٿيو ، جنهن ۾ سجاول، ٺٽو ۽ بدين ضلعن ۾ سرڪاري ڪارڪردگي ، ترقياتي منصوبن ۽ عوامي خدمتن جي بهتري بابت معاملن جو تفصيلي جائزو ورتو ويو۔ان موقعي تي لاڳاپيل آفيسرن کي هدايت ڪئي وئي ته ترقياتي اسڪيمون وقت سر مڪمل ڪيون وڃن، قيمتن تي ڪنٽرول رکيو وڃي، ناجائز قبضا ختم ڪيا وڃن ۽ سرڪاري زمينن جي واپسي کي يقيني بڻايو وڃي۔ ڪمشنر لينڊ رڪارڊ جي درستگي ڪمپيوٽرائيزيشن تي پڻ خاص زور ڏيندي چيو ته رڪارڊ ۾ شفافيت انتهائي ضروري آهي۔ فياض حسين عباسي هدايت ڪئي ته صفائي سٿرائي جي نظام کي وڌيڪ بهتر بڻايو وڃي، کليل مين هولز کي فوري طور بند ڪيو وڃي ۽ سلاٽر هائوسز جي باقاعده جاچ ذريعي صحت جا اصول لاڳو ڪرايا وڃن۔ هن فائر سيفٽي آڊٽس ۽ ٻين حفاظتي قدمن تي به ڌيان ڏيڻ جي هدايت ڪئي۔اجلاس ۾ ڊيش بورڊ مانيٽرنگ سسٽم جي مؤثر استعمال تي زور ڏنو ويو ۽ چيو ويو ته روزاني بنياد تي ڪارڪردگي جو جائزو وٺي لاڳاپيل کاتن جي وچ ۾ بهتر رابطو قائم ڪيو وڃي ته جيئن عوامي مسئلن جو فوري حل ممڪن بڻائي سگهجي۔ ڊويزنل ڪمشنر چيو ته عوام کي معياري سهولتون فراهم ڪرڻ حڪومت جي اولين ترجيح آهي ۽ ان سلسلي ۾ ڪنهن به قسم جي ڪوتاهي برداشت نه ڪئي ويندي۔ هن لاڳاپيل عملدارن کي هدايت ڪئي ته هو فيلڊ ۾ پنهنجي موجودگي کي يقيني بڻائين ۽ڪارڪردگي ۾ واضح بهتري آڻين۔اجلاس ۾ ڊپٽي ڪمشنر سجاول زاهد حسين رند، ڊپٽي ڪمشنر ٺٽو سرمد علي ڀاڳت ۽ ڊپٽي ڪمشنر بدين ياسر ڀٽي کان علاوه ٽنهي ضلعن جا ايڊيشنل ڊپٽي ڪمشنر ، اسسٽنٽ ڪمشنرز شريڪ ٿيا ۽ پنهنجي پنهنجي ڪارڪردگي بابت بريفنگ ڏني۔