باقراڻي جي ڪچي ۾ ماءُ ڌيءَ قتل، سندن لاش سنڌو درياءَ ۾ اڇلايا ويا

ڳوٺ شادن جتوئي ۾ علي حيدر جتوئي پنهنجي بيواهه ڀاڄائي شاهده ۽ سندس ڌيءَ 19 ورهين جي نغما کي قتل ڪيو

باقراڻي(رپورٽر) جوابدار پنهنجي بيواھ سئوٽ ۽ سندس ڌي کي قتل ڪري سنڌو درياهه ۾ لاش اڇلائي ڇڏيا، پوليس ڳولا بعد لاش دريا مان ڪڍي ورتا، ڪيس داخل.... باقراڻي تعلقي جي شھيد الاهي بخش سيال ٿاڻي جي حد جي ڪچي واري علائقي ڳوٺ شادن جتوئي ۾ مبينا گهرو اڻبڻت تان پيش آيل افسوسناڪ واقعي ۾ جوابدار علي حيدر جتوئي مبينا طور پنهنجي سئوٽ 45 ورهين جي بيواهه عورت مسمات شاهده خاتون ۽ سندس 19 ورهين جي ڌي مسمات نغمه خاتون کي پسٽل جا فائر ڪري قتل ڪرڻ بعد سندن لاش سنڌو درياهه ۾ اڇلائي ڇڏيا، واقعي جو ڪيس شھيد الاهي بخش سيال ٿاڻي تي مقتولا شاهده خاتون جي سئوٽ مسمات حاڪم خاتون جتوئي جي فرياد تي جوابدار علي حيدر جتوئي خلاف داخل ڪيو ويو آهي، فريادڻ پنهنجي بيان ۾ ڄاڻايو آهي ته جوابدار مقتولين سان گڏ رهندو هو ۽ ماني دير سان پچائڻ واري معاملي تان ڪاوڙجي هن بيواهه ڀاڄائي شاهده خاتون ۽ ڀائٽي نغمه خاتون کي پسٽل جا فائر ڪري قتل ڪيو، جڏهن ته موقف اهو به ڄاڻايو آهي ته جوابدار ٻنهي کي هوٽل تي ماني کارائڻ جي بهاني وٺي وڃي قتل ڪيو، هوڏانهن شھيد الاهي بخش سيال پوليس موجب واقعو پيش اچڻ بعد جوابدار ٻنهي عورتن کي گوليون هڻي قتل ڪيو ۽ لاش درياهه ۾ اڇلايو، پوليس ڪارروائي ڪندي ڳولا بعد ٻنهي مقتول عورتن جا لاش سنڌو درياهه مان ڪڍرائي پوسٽ مارٽم لاءِ ڏوڪري اسپتال منتقل ڪيا آهن، پوليس موجب جوابدار خلاف قتل جو ڪيس داخل ڪري ڇڏيو ويو آهي ۽ سندس گرفتاري لاءِ مختلف هنڌن تي ڇاپا هنيا پيا وڃن، جڏهن ته واقعي جي وڌيڪ جاچ جاري آهي۔اايس ايس پي جي نوٽيس بعد پوليس جوابدار کي گرفتار ڪري ورتو