ملير ۾ گئس جي بندش خلاف شهري روڊن تي نڪري آيا، قومي شاهراهه بلاڪ

رهواسين قومي شاهراهه تي ڌرڻو هڻي ٽريفڪ معطل ڪري ڇڏيو، گاڏين جون قطارون لڳي ويون

ملير (رپورٽ: عبدالرشيد مورجھريو) ملير سٽي ٿاڻي جي حدن ۾ گيس جي ڊگهي بندش خلاف شهري روڊن تي نڪري آيا ۽ قومي شاهراهه تي احتجاجي ڌرڻو هنيو، جنهن سبب ٽريفڪ جي رواني سخت متاثر ٿي وئي ۽ گاڏين جون ڊگهيون قطارون لڳي ويونمظاهرين جو چوڻ هو ته ڪيترن ئي ڏينهن کان گهرن ۾ گيس فراهم نٿي ڪئي وڃي، جڏهن ته باقاعدي بل ادا ڪرڻ باوجود گيس جي بندش شهرين سان ناانصافي آهي۔ شهرين انتظاميا خلاف نعريبازي ڪندي فوري طور گيس بحالي جو مطالبو ڪيو۔ واقعي جي اطلاع ملڻ تي ڊي ايس پي ملير سٽي عابد مهر پوليس ٽيم سميت موقعي تي پهتو ۽ احتجاج ڪندڙن سان ڳالهيون شروع ڪيون۔ مظاهرين ڊي ايس پي کي آگاهه ڪيو ته گيس نه هجڻ سبب گهريلو زندگي سخت متاثر ٿي رهي آهي ۽ شهرين کي شديد مشڪلاتن کي منهن ڏيڻو پئجي رهيو آهي۔ڊي ايس پي ملير سٽي عابد مهر جي يقين ڏيارڻ ۽ ڪامياب ڳالهين بعد مظاهرين احتجاج ختم ڪري ڇڏيو، جنهن کانپوءِ بند روڊ ٽريفڪ لاءِ کوليو ويو ۽ ٽريفڪ جي رواني بحال ٿي وئي۔شهرين مطالبو ڪيو ته لاڳاپيل اختيارين فوري نوٽيس وٺي گيس جي فراهمي يقيني بڻائين ته جيئن ايندڙ وقت ۾ شهرين کي احتجاج ڪرڻ تي مجبور نه ٿيڻو پوي۔