مفتي عبدالرحمان ٺٽوي جي چاليهي ۽ دستاربندي جي تقريب

مڪلي جي مدرسه دارالعلوم مجدديه عثمانيه ۾ عقيدت ۽ احترام سان منعقد

ٺٽو(محمد شفيق ڀٽي)مفتي عبدالرحمان ٺٽوي جي چاليهي ۽ دستاربندي جي تقريب منعقد. خبر موجب ٺٽي ۾ ناليواري ديني عالم مخدوم مفتي اعظم عبدالرحمان ٺٽوي جي چاليهي ۽ سندس صاحبزادي حافظ فيض الرحمان جي دستاربندي تقريب مڪلي جي مدرسه دارالعلوم مجدديه عثمانيه ۾ عقيدت ۽ احترام سان منعقد ڪئي وئي۔ تقريب ۾ سنڌ جي مختلف علائقن مان آيل عالمن، حافظن ۽ عقيدتمندن وڏي انگ ۾ شرڪت ڪئي، جتي مرحوم جي علمي ۽ ديني خدمتن تي روشني وڌي وئي ۽ کيس خراجِ عقيدت پيش ڪيو ويو۔ ان موقعي تي حافظ غلام محمد سوھو ۽ مفتي محمد يامين جَمَاري خطاب ڪندي چيو ته مفتي عبدالرحمان ٺٽوي هڪ جليل القدر عالم، بهترين استاد ۽ دين جا خادم هئا، جن پنهنجي زندگي علم، تقويٰ ۽ خدمتِ دين لاءِ وقف ڪئي ۽ سندن کوٽ گهڻي عرصي تائين محسوس ڪئي ويندي۔ تقريب دوران حافظ فيض الرحمان جي دستاربندي پڻ ڪئي وئي، جڏهن ته آخر ۾ مرحوم جي مغفرت، درجات جي بلندي ۽ ملڪ جي امن لاءِ دعا گهري وئي۔