رزاق آباد ۾ تيل جي اگهن ۾ واڌ ۽ مهانگائي خلاف احتجاجي ريلي

قومي عوامي تحريڪ يونٽ رزاق آباد طرفان مک چوڪ کان احتجاجي ريلي ڪڍي وئي

ملير (عبدالرشيد مورجھريو) قومي عوامي تحريڪ يونٽ رزاق آباد طرفان ضلعي آرگنائزر جنسار هيسباڻي، لال چند، لڇمڻ ۽ اقبال ڪلمتي جي اڳواڻي ۾ تيل جي اگهن ۾ واڌ ۽ ڳاٽي ٽوڙ مهانگائي خلاف رزاق آباد جي مک چوڪ کان احتجاجي ريلي ڪڍي وئي، جيڪا مختلف رستن تان گذرندي عوامي پريس ڪلب ملير پهتي جتي ڪارڪنن ڌرڻو هڻي سخت نعريبازي ڪئي۔ان موقعي تي اڳواڻن خطاب ڪندي چيو ته تيل جي اگهن ۾ بار بار واڌ سبب مهانگائي جو طوفان اچي ويو آهي، جنهن ڪري غريب ۽ مزدور طبقو سخت پريشان ٿي ويو آهي۔ هنن چيو ته بجلي، گئس، کاڌي پيتي جون شيون ۽ روزمره استعمال جون سڀئي ضرورتون مهانگيون ٿيڻ سبب عوام جو گذر سفر مشڪل ٿي ويو آهي۔اڳواڻن وڌيڪ چيو ته حڪومت عوام کي رليف ڏيڻ بدران مسلسل مهانگائي جا بم ڪيرائي رهي آهي، جنهن سان عوام جو جيئڻ ڏکيو بڻجي ويو آهي۔ هنن مطالبو ڪيو ته تيل جي اگهن ۾ ڪيل واڌ فوري طور واپس ورتي وڃي ۽ مهانگائي تي ضابطو آڻي عوام کي رليف فراهم ڪيو وڃي۔احتجاج ۾ شرڪت ڪندڙ ڪارڪنن هٿن ۾ پلي ڪارڊ ۽ بينر کڻي حڪومت خلاف نعريبازي ڪئي ۽ چيو ته جيڪڏهن مهانگائي تي ضابطو نه آندو ويو ته احتجاج جو دائرو وڌيڪ وڌايو ويندو۔آخر ۾ اڳواڻن اعلان ڪيو ته قومي عوامي تحريڪ عوامي مسئلن جي حل تائين پنهنجو احتجاج جاري رکندي