حيدرآباد ۾ قتل ٿيل پ پ شهيد ڀٽو جي اڳواڻ ڪاشف باغي جي قاتلن جي گرفتاري لاءِ عمرڪوٽ ۾ احتجاج

ڪاشف باغي جي قاتلن جي گرفتاري لاءِ سامارو کان عمرڪوٽ پريس ڪلب تائين ريلي ڪڍي احتجاج ڪيو ويو

عمرڪوٽ (رپورٽ:ڪانجي مل رکيسر) ٻه هفتا اڳ حيدرآباد ۾ گوليون هڻي بيدردي سان قتل ڪيل شهيد ڀٽو اڳواڻ ڪاشف باغي جي قاتلن جي گرفتاري لاءِ پريس ڪلب عمرڪوٽ آڏو احتجاجي مظاهرو ڪيو ويو، سامارو کان وڏي انگ ۾ ماڻهن ريلي ڪڍي عمرڪوٽ پريس ڪلب آڏو پهچي سخت نعريبازي ڪندي انصاف جو مطالبو ڪيو، مظاهري ۾ پي ٽي آءِ اڳواڻ لال مالھي، ليکراج مالھي، يونس چانڊيو، امان الله، بابو قائم خاني، اورنگزيب قائم خاني، محمد عظيم خاصخيلي، سميت ٻين ڪارڪنن ۽ شهرين وڏي انگ ۾ شرڪت ڪئي، ان موقعي تي مظاهرين ميڊيا سان ڳالهائيندي چيو ته ٻه هفتا گذرڻ باوجود به ڪاشف باغي جي قتل ڪيس ۾ جوابدارن کي گرفتار ناهي ڪيو ويو، جڏهن ته ڪيس داخل هجڻ باوجود پوليس ڪارروائي ڪرڻ ۾ ناڪام ٿي آهي، ھنن الزام هنيو ته حيدرآباد جي بلڊر آفاق ۽ وليد فاروقي ڪاشف باغي کي گوليون هڻي قتل ڪيو، پر پوليس کين گرفتار ڪرڻ بدران بچائڻ جي ڪوشش ڪري رهي آهي، مظاهرين وڌيڪَ چيو ته جيڪڏهن جلد قاتلن کي گرفتار نه ڪيو ويو ته هو جونيئر ذوالفقار ڀٽو جي ڪال تي سڄي سنڌ ۾ احتجاجي تحريڪ هلائيندا، هنن حڪومت ۽ پوليس کان مطالبو ڪيو ته فوري طور جوابدارن کي گرفتار ڪري ڪاشف باغي جي وارثن کي انصاف فراهم ڪيو وڃي، مظاهرو پرامن نموني سان ختم ٿيو، جڏهن ته مظاهرين انصاف ملڻ تائين جدوجهد جاري رکڻ جو اعلان ڪيو.