ملير: يوسي 3 پپري ۾ ترقياتي فنڊن متعلق عوامي پڇاڻو

صابو گبول ڳوٺ جي اسڪول ۽ گهٽيون گٽر جي پاڻي سان ڀريل

ملير (رپورٽ: عبدالرشيد مورجھريو)يونين ڪميٽي نمبر 3 پپري جي علائقي صابو گبول ڳوٺ ۾ واقع سرڪاري اسڪول، علائقي ۾ گندگي ۽ نيڪال جي خراب نظام جي خرابي سبب مقامي رهواسين ۾ ڳڻتي وڌي وئي آهي۔ علائقي واسين موجب اسڪول جي عمارت زبون حالي جو شڪار آهي، بنيادي سهولتن جي کوٽ آهي جڏهن ته ٻارن جي ويهڻ لاءِ مناسب انتظام به موجود ناهي، جنهن ڪري شاگردن کي تعليم حاصل ڪرڻ ۾ سخت ڏکيائين کي منهن ڏيڻو پئجي رهيو آهي۔مقامي ماڻهن جو چوڻ آهي ته يونين ڪاميٽي پپري کي هر مهيني لڳ ڀڳ 12 لک رپيا ملن ٿا، پر انهن فنڊن جي استعمال بابت ڪا به شفافيت نظر نٿي اچي۔ شهرين موجب علائقي ۾ ترقياتي ڪم نه هجڻ برابر آهن، جڏهن ته صابو گبول ڳوٺ سميت پپري جا ٻيا ڳوٺ به بنيادي سهولتن کان محروم آهن۔رهواسين وڌيڪ الزام هنيو ته گڏاپ ٽائون ۾ ترقياتي ڪمن جا ٽينڊر جاري ٿيڻ باوجود پپري جي اڪثر ڳوٺن کي مسلسل نظرانداز ڪيو پيو وڃي۔ شهرين موجب ترقياتي فنڊن کي ٻهراڙين جي علائقن تي خرچ ڪرڻ بدران مخصوص منصوبن ۽ بلڊرز کي نوازيو پيو وڃي، جنهن سبب مقامي آبادي مسئلن جو شڪار بڻيل آهي۔علائقي واسين ٻڌايو ته اسڪول جي مرمت، پيئڻ جي پاڻي، صفائي سٿرائي ۽ ٻين بنيادي سهولتن لاءِ ڪيترائي ڀيرا لاڳاپيل اختيارين کي درخواستون ڏنيون ويون آهن، پر هينئر تائين ڪو به عملي قدم نه کنيو ويو آهي۔ سندن چوڻ آهي ته جيڪڏهن صورتحال ساڳي رهي ته ٻارن جي تعليم وڌيڪ متاثر ٿيندي ۽ علائقي ۾ تعليمي پسماندگي وڌندي۔ شهرين، سماجي ڪارڪنن ۽ والدين ميئر ڪراچي کان فوري نوٽيس وٺڻ جو مطالبو ڪندي چيو آهي ته يونين ڪميٽي 3 پپري جي فنڊن جي شفاف جاچ ڪرائي وڃي ۽ صابو گبول ڳوٺ سميت نظرانداز ٿيل علائقن ۾ فوري ترقياتي ڪم شروع ڪيا وڃن۔ مقامي ماڻهن مطالبو ڪيو ته اسڪول جي فوري مرمت، بنيادي سهولتن جي فراهمي ۽ ترقياتي فنڊن جي شفاف استعمال کي يقيني بڻايو وڃي،