ڊي سي ٺٽو سرمد علي ڀاڳت جي صدارت هيٺ پوليو مهم جي حوالي سان اجلاس

مائڪرو پلان کي بهتر بڻايو وڃي ۽ انڪار ڪندڙن کي هر صورت ۾ شامل ڪيو وڃي: سرمد علي ڀاڳت

ٺٽو( محمد شفيق ڀٽي) ڊپٽي ڪمشنر ٺٽو سرمد علي ڀاگت ضلعي ۾ شروع ٿيندڙ پوليو مهم کي موثر ۽ ڪامياب بڻائڻ لاءِ صحت کاتي سميت ٻين سمورن لاڳاپيل کاتن جي آفيسرن ۽ اسٽيڪ هولڊرز سان دربار هال مڪلي ۾ هڪ اهم اجلاس منعقد ڪيو. اجلاس دوران ڊپٽي ڪمشنر هدايت ڪئي ته مائڪرو پلان کي بهتر بڻايو وڃي ۽ انڪار ڪندڙن کي هر صورت ۾ شامل ڪيو وڃي. هن زور ڏنو ته هر ٻار کي پنهنجو ٻار سمجهي پوليو کان بچاءُ جا قطرا پياريا وڃن، پوليو مهم هڪ قومي فرض آهي ۽ ان ۾ ڪا به غفلت برداشت نه ڪئي ويندي. ڊپٽي ڪمشنر ان ڳالهه تي به زور ڏنو ته پي پي ايڇ آءِ ۽ استاد مهم ۾ پنهنجو ڪردار ادا ڪن ۽ اسسٽنٽ ڪمشنر پنهنجن علائقن ۾ سڀني اسٽيڪ هولڊرز سان ملاقاتون ڪن ته جيئن مهم دوران ڪو مسئلو پيدا نه ٿئي. پوليو ورڪرز مهم دوران پيش ايندڙ مسئلا بيان ڪيا، جنهن تي ڊپٽي ڪمشنر يقين ڏياريو ته مسئلا حل ڪيا ويندا ۽ ڪم نه ڪندڙ ورڪرن خلاف ڪارروائي ڪئي ويندي. ڊپٽي ڪمشنر چيو ته سخت نگراني ذريعي اميد آهي ته 100 سيڪڙو نتيجا حاصل ٿيندا ۽ ڪو به ٻار پوليو جا ڦڙا پيئڻ کان محروم نه رهندو. هن چيو ته هو پاڻ به مهم جي نگراني ڪندو. اجلاس ۾ ڊسٽرڪٽ ھيلٿ آفيسر ڊاڪٽر صفدر علي شاہ، ضلعي جي سڀني اسسٽنٽ ڪمشنرن، مختيارڪارن، تپيدارن، پوليو فوڪل پرسنز، سوسل ويلفيئر، تعليم، مرف، لوڪل گورنمينٽ ۽ ٻين اسٽيڪ هولڊرن سميت يو سي ايم اوز، يو سي سيڪريٽريز ۽ خانگي اسڪول ايسوسيئيشن جي نمائندن شرڪت ڪئي.