ڊپٽي ڪمشنر ٺٽو سرمد علي پاران سول اسپتال جو تفصيلي دورو

سرمد علي اسپتال جي مختلف شعبن جو معائنو ڪري صورتحال جو جائزو ورتو

ٺٽو( محمد شفيق ڀٽي) ڊپٽي ڪمشنر سرمد علي سول اسپتال جو تفصيلي دورو ڪيو ، جتي هن اسپتال جي مختلف شعبن جو معائنو ڪري صورتحال جو جائزو ورتو. ڊپٽي ڪمشنر ايمرجنسي بلاڪ، او پي ڊي، نئون تعمير ٿيل ڊائگنوسٽڪ سينٽر، ميڊيڪل اسٽور، فيميل وارڊ، حفاظتي ٽُڪن جو مرڪز، مليريا سينٽر سميت ٻين شعبن جو جائزو ورتو. ان موقعي تي ريجنل پروگرام مينيجر مرف آدم ملڪ ۽ سول سرجن ڊاڪٽر سيد يامين شاهه ڊپٽي ڪمشنر کي اسپتال ۾ مهيا ڪيل طبي سهولتن، ڊاڪٽرن ۽ عملي جي ڪارڪردگي، دوائن جي موجودگي ۽ مريضن کي ڏنل سهولتن بابت تفصيلي بريفنگ ڏني. ان موقعي تي ڊپٽي ڪمشنر سرمد علي اسپتال ۾ داخل مريضن ۽ سندن تيماردارن سان به ڳالهه ٻولهه ڪئي ۽ کين ملندڙ طبي سهولتن بابت معلومات ورتي جڏھن تہ مريضن ۽ تيماردارن اسپتال انتظاميه جي سهولتن تي اطمينان جو اظهار ڪيو. ڊپٽي ڪمشنر اسپتال انتظاميه کي هدايت ڪئي ته مريضن کي بهترين طبي سهولتن جي فراهمي سميت دوائن جي مڪمل دستيابي برقرار رکي وڃي، اسپتال اندر صفائي سٿرائي تي خاص ڌيان ڏنو وڃي ۽ ايمرجنسي مريضن کي فوري ۽ موثر طبي امداد مهيا ڪئي وڃي. ڊپٽي ڪمشنر سرمد علي سول اسپتال جي انتظاميه ۽ عملي جي ڪارڪردگي جي تعريف ڪندي اميد ظاهر ڪئي ته عوام کي بهتر ۽ معياري طبي سهولتون مهيا ڪرڻ لاءِ سچائي، ايمانداري جذبي سان ڪم جاري رکيو ويندو. ھُن چيو تہ عوام کي صحت جون بھتر سھولتون فراھم ڪرڻ ضلعي انتظاميہ جي اولين ترجيحي آھي.