عمرڪوٽ ۾ مبينا ٺڳي خلاف ڪولهي برادري جو احتجاج، 15 سالن کان سون، چاندي ۽ روڪ رقم واپس نه ملڻ جو الزام

عمرڪوٽ (رپورٽ:ڪانجي مل رکيسر) ڪولهي دڙو واسي گينو ولد جگمال ڪولهي پنهنجي برادري جي عورتن ۽ مردن سان گڏ عمرڪوٽ پريس ڪلب پهچي احتجاجي مظاهرو ڪندي الزام لڳايو آهي ته شاهي بازار جي سوناري راجيش ولد جيرام داس ڀوراڻي وٽ سندن سون، چاندي ۽ روڪ رقم 15 سالن کان امانت طور پيل آهي، جيڪا اڄ ڏينهن تائين واپس ناهي ڪئي وئي، گينو ڪولهي ٻڌايو ته هن پنهنجي نياڻي جي شادي لاءِ ٻه تولا سون، 125 تولا چاندي ۽ 10 لک 70 هزار رپيا گڏ ڪري رکيا هئا، هن دعويٰ ڪئي ته راجيش سونارو کين 16 لک جي لاٽري کولڻ جو لالچ ڏئي رقم امانت طور ورتي ۽ واعدو ڪيو ته نياڻي جي شادي وقت سڄي رقم ۽ زيور واپس ڪندو پر جڏهن شادي جو وقت ويجهو آيو ته هن مبينا طور ڪوڙا آسرا ڏيڻ شروع ڪيا، هن وڌيڪَ چيو ته 11 سالن تائين واعدا پورا نه ڪيا ويا، جنهن سبب هن پنهنجين نياڻين جون شاديون دوستن ۽ بئنڪن کان قرض کڻي ڪرايون، الزام آهي ته جوابدار کيس پنهنجي دڪان تي ويهاري مختلف بهانا ڪندو رهيو ۽ لکت ۾ واعدا ڪرڻ باوجود به عمل نه ڪيو، احتجاج دوران گنگارام، هيرالال، ڪرمچند، ڀيمون، راجا، نونلي، آهسري، چوني، ڏائي ۽ ديوي پڻ موجود هئا، جن اختيارين کان جاچ ڪرائي انصاف فراهم ڪرڻ جو مطالبو ڪيو، احتجاجي مظاهرو ڪندڙن ايس ايس پي عمرڪوٽ کان اپيل ڪئي آهي ته معاملي جي شفاف انڪوائري ڪرائي کين سندن رقم ۽ زيور واپس ڏياريا وڃن، جيئن غريب خاندانن سان انصاف ٿي سگهي.