جهوڪ واسي نوجوان جو ٺٽي ۾ ڀائرن خلاف احتجاج

خانداني زمين ۾ منهنجو به قانوني طور حصو شامل آهي: الطاف سگريو

ٺٽو( محمد شفيق ڀٽي) سجاول جي جهوڪ واسي الطاف سگريو عوامي پريس ڪلب ٺٽو ۾ صحافين آڏو دانهيندي الزام هنيو آهي ته ديھ جهوڪ ۽ ديھ دالي ۾ سندن خانداني زرعي زمين موجود آهي، جنهن ۾ سندس به قانوني حصو شامل آهي. هن چيو ته سندس ڀائر احمد علي سگريو، جاويد سگريو ۽ وزير سگريو ڪجهه بااثر ماڻهن سان ملي ڪري اها زمين مختلف ماڻهن کي وڪرو ڪري رهيا آهن. الطاف سگريو موجب، تر جي بااثر شخص عبدالرحيم ۽ سندس ڀاءُ نظير سگريو جي سهڪار سان سندن خانداني ملڪيت غير واسطيدار ماڻهن کي منتقل ڪئي پئي وڃي، جنهن سبب سندس حق متاثر ٿي رهيو آهي. هن خدشو ظاهر ڪيو ته جيڪڏهن وقت سر ڪارروائي نه ٿي ته کيس مالي ۽ خانداني نقصان پهچي سگهي ٿو. هن Sindh Police جي اعليٰ اختيارين سميت ايس ايس پي سجاول، ڊپٽي ڪمشنر سجاول ۽ ڊي ايس پي بٺورو کان مطالبو ڪيو آهي ته معاملي جو شفاف جاچ ڪرائي فوري انصاف فراهم ڪيو وڃي ۽ سندس قانوني حصو کيس ڏياريو وڃي. الطاف سگريو اختيارين کان اپيل ڪئي آهي ته زمين جي وڪري بابت رڪارڊ جي ڇنڊڇاڻ ڪري اصل حقيقت سامهون آندي وڃي ته جيئن ڪنهن به ڌر سان ناانصافي نه ٿئي.