ڪنري پوليس جي ننڍي عمر ۾ شادي جي اطلاع تي ڪارروائي، گهوٽ، پنڊت ۽ ٻيا گرفتار

پوليس نينگري گڏي ڪولهي جي امڙ جي فرياد تي ڪارروائي ڪري ڪنوار کي تحويل ۾ ورتو

عمرڪوٽ(رپورٽ:ڪانجي مل رکيسر)ڪنري ڀرسان پڪوموڙ جي ڳوٺ ڪرشن واڻيو ۾ ننڍي ڄمار ۾ شادي جي اطلاع تي ڪنري پوليس شادي ڪاڄ دوران ڇاپو هڻي ننڍي عمر جي ڪنوار گڏي ڌيءُ ٽيڪم ڪولھي ۽ گھوٽ مولچند ولد گلاب ڪولھي کي تحويل ۾ وٺي ورتو پوليس ڪاروائي دوران شادي ڪرائيندڙ پنڊت ڏانو ڪولھي، ڪنوار جي ڏاڏي ليمٻو ڪولھي به پوليس تحويل ۾ ورتو ويو، سمورن ماڻھن کي ڪنري ٿاڻي منتقل ڪيو ويو، پوليس ڄاڻايو ته ڪاروائي ڪنوار جي ماءُ ڪويتا ڪولھي جي شڪايت تي ڪئي وئي، ڪنري ٿاڻي آڏو ڪنوار جي ماءُ ڪويتا ڪولھي ميڊيا کي ٻڌايو ته منھنجي نياڻي جي عمر ننڍي آهي منهنجو سھرو پنجاھ ھزار جي عيوض منهنجي نياڻي کي وڪرو زوري شادي پئي ڪرائي، ڪنوار گُڏي ڪولھي جو چوڻ ھو ته آئون مولچند سان شادي ۾ خوش آھيان ۽ منھنجي رضا سان شادي ٿي رھي آھي، ٻئي پاسي ڪنوار جي ڏاڏي ليمٻو ڪولھي ٻڌايو ته مون ڪا به پيسا ناهن ورتا، ننھن سندس ڌيءِ جي بلوچستان ۾ شادي ڪرائڻ چاھي ٿي جيڪا نياڻي کي پسند نه ھئي شادي نياڻي جي رضا خوشي سان پئي ڪرائي. نياڻي مولچند سان شادي ۾ خوش آھي ماءُ وڪرو ڪرڻ جا ڪوڙا الزام لڳائي رھي آهي. ٻئي پاسي ڪنري پوليس جوڙي کي عمرڪوٽ وومين پوليس حوالي ڪري ڇڏيو جنھن بعد پوليس گرفتار گھوٽ، سندس ماءُ ۽ پنڊت سميت 10 ڄڻن خلاف ڪيس داخل ڪري ڇڏيو، وومين ٿاڻي عمرڪوٽ تي ڪنوار گڏي ڪولھي جي ماءُ ڪويتا ڪولھي جي فرياد تي ڪيس داخل ڪيو ويو. ڪيس ۾ گھوٽ مولچند ڪولھي، پنڊت ڏانو ڪولھي، ڪنوار جي ڏاڏي ليمٻو ڪولھي، ڪنوار جي چاچن موھن ۽ هميرو ڪولھي، گھوٽ جو والده شريمتي رامون ڪولھي، گھوٽ جي ڀاءُ رميش ڪولھي ۽ شادي ۾ شامل پوڙھو، يوسف ۽ شاھنواز ڪپري کي نامزد ڪيو ويو. فريادڻ ڪيس ۾ ڄاڻايو آھي ته منھنجي ڌيءُ گُڏي جنھن جي ڄمار 14 سال آھي جنھن کي ڄاڻايل ماڻھو زوري ننڍي ڄمار ۾ شادي ڪرائي رهيا آھن، پوليس پاران گرفتار گھوٽ، پنڊت ۽ ڪنوار جي ڏاڏي کي لاڪپ حوالي ڪري ڇڏيو ۽ ڪنوار کي پنھنجي تحويل ۾ رکي ڇڏيو کين اڄ ڪورٽ ۾ پيش ڪيو ويندو.