ملير پوليس پاران 3ڏوهاري گرفتار ڪرڻ جي دعويٰ

نديم عرف گن شارٽ ۽ امجد علي ۽ محمد عطا کي گرفتار ڪيو: پوليس

ملير (رپورٽ: عبدالرشيد مورجھريو) ملير جي علائقي ڪوهي ڳوٺ ندي پل ملير ڀرسان گذريل رات دير سان شاہ لطيف پوليس پارٽي ۽ موٽرسائيڪلن تي سوار هٿياربند ڦورن وچ ۾ مبينا مقابلو ٿي پيو فائرنگ پوليس موجب ٻنهي طرفن کان فائرنگ جي نتيجي ۾ ٻه جوابدار زخمي حالت ۾ گرفتار ڪيا ويا، جڏهن ته مجموعي طور ٽن جوابدارن کي حراست ۾ ورتو ويو جڏهن ته هڪ جوابدار موقعي تان فرار ٿيڻ ۾ ڪامياب ٿي ويو۔گرفتار جوابدارن جي سڃاڻپ نديم عرف گن شارٽ ولد بچل، امجد علي ولد شوڪت علي ۽ محمد عطا المصطفٰي ولد شمشاد علي طور ٿي آهي۔ پوليس اختيارين جو چوڻ آهي ته جوابدار ٿاڻي شاهه لطيف جي حدن اندر مختلف وارداتن ۾ ملوث رهيا آهن۔پوليس جوابدارن وٽان 02 عدد 30 بور پسٽل بمعه راونڊ، 03 عدد ٽچ موبائيل فون، 01 عدد ڪي پيڊ موبائيل، 01 عدد پرس ۽ هڪ موٽرسائيڪل هونڊا 125 هٿ ڪري ورتي آهي۔ هٿ آيل موٽرسائيڪل بغير نمبر پليٽ ۽ پنچ ڪيل نمبر سان ملي، جنهن جو رڪارڊ سي ايل پي سي ذريعي چيڪ ڪيو پيو وڃي۔پوليس موجب گرفتار ملزمن جو ڪرمنل رڪارڊ جديد سرچ ڊيوائس سسٽم وسيلي چيڪ ڪيو ويو، جنهن مان معلوم ٿيو ته جوابدار مختلف ٿاڻن تي اڳ ۾ به گرفتار ٿي جيل وڃي چڪا آهن۔زخمي حالت ۾ گرفتار ملزمن کي طبي امداد لاءِ اسپتال منتقل ڪيو ويو آهي، جڏهن ته سندن قبضي مان هٿ آيل هٿيار فرانزڪ جاچ لاءِ اماڻيا پيا وڃن۔ پوليس جو چوڻ آهي ته جوابدارن خلاف ضابطي موجب ڪيس داخل ڪري وڌيڪ جاچ شروع ڪئي وئي آهي۔