باقراڻي جي ديهه ٺلاهه ۾ اڍائي ايڪڙ زمين تي قبضو ڪيو ويو آهي: ذوالفقار علي ڪمبوهه

54 views | 16th Feb 2026 • سنڌي خبرون

هارين محمد موسيٰ ۽ محمد عسيسي زمين تي قبضو ڪيو، يوسي چيئرمين منظور مڱڻ سندن پٺڀرائي ڪري رهيو آهي

باقراڻي جي ديهه ٺلاهه ۾ اڍائي ايڪڙ زمين تي قبضو ڪيو ويو آهي: ذوالفقار علي ڪمبوهه

ملير (رپورٽ : عبدالرشيد مورجھريو) ريٽائرڊ جج ۽ ميمبر ملير بار ايسوسيئيشن ذوالفقار علي ڪمبوھ عوامي پريس ڪلب ملير ۾ هنگامي پريس ڪانفرنس ڪندي الزام هنيو آهي ته ضلعي لاڙڪاڻو جي تعلقي باقراڻي، ديھ ٺلها ڳوٺ حڪيم سنديلو ۾ واقع سندس اڍائي ايڪڙ زرعي زمين تي سندس هارين محمد موسيٰ ۽ محمد عيسيٰ ولد غلام رسول مبينا طور قبضو ڪري ورتو آهي ۽ تيار فصل به پنهنجي قبضي ۾ وٺي ڇڏي آهي هن چيو ته هن معاملي بابت ڊپٽي ڪمشنر ۽ ايس پي لاڙڪاڻو کي لکت ۾ درخواستون ڏنيون ويون آهن، پر اڃا تائين مبينا قبضي ڪندڙن خلاف ڪا اثرائتي ڪارروائي عمل ۾ نه آندي وئي آهي ذوالفقار علي ڪمبوھ وڌيڪ الزام هنيو ته يو سي محرابپور جو چيئرمين منظور مڱڻ مبينا طور قبضي ڪندڙ ڌرين جي پٺڀرائي ڪري رهيو آهي سندس چوڻ هو ته منظور مڱڻ پيپلز پارٽي تعلقي باقراڻي جو نائب صدر پڻ آهي ۽ پنهنجي اثر رسوخ جو استعمال ڪري رهيو آهي ريٽائرڊ جج جو چوڻ هو ته هو پاڻ معاملو ڳالهين ذريعي حل ڪرڻ لاءِ منظور مڱڻ وٽ ويو، پر مسئلو سلجهائڻ بدران لاڙڪاڻو پريس ڪلب ۾ سندس خلاف پريس ڪانفرنس ڪري الزام هنيا ويا، جن کي هن سختي سان رد ڪيو هن ٻڌايو ته ڄاڻايل زرعي زمين سندس والد حاجي محمد صديق سال 2001ع ۾ خريد ڪئي هئي، جنهن تي ڄاڻايل ماڻھون بطور ھاري ڪم ڪري رهيا هئا هن وڌيڪ چيو ته مبينا قبضو ڪندڙن بااثر ماڻهن ذريعي زمين جي ڪاغذن ۾ ردوبدل ڪرائڻ جي ڪوشش پڻ ڪئي، جيڪا بروقت ڪارروائي سان واپس ڪرائي وئي ذوالفقار علي ڪمبوھ اعليٰ اختيارين کان مطالبو ڪيو ته زمين تي قبضي جو فوري نوٽيس وٺي شفاف جاچ ڪرائي وڃي، مبينا مداخلت ۽ جعلسازي جي ڪوششن جي ڇنڊڇاڻ ڪئي وڃي ۽ کيس سندس قانوني ملڪيت جو تحفظ فراهم ڪيو وڃي