گڏاپ سٽي ۽ ڀرپاسي جي سوين ڳوٺن جي ھڪ مھيني کان بجلي بند، رهواسين جو ڌرڻو

بجلي جي بندش خلاف رهواسين پاران عورتن سميت گرڊ اسٽيشن آڏو ڌرڻو هنيو ويو، ٽريفڪ معطل

ملير (رپورٽ: عبدالرشيد مورجھريو) گڏاپ سٽي ۽ ان سان لاڳاپيل سوين ڳوٺن ۾ گذريل ھڪ مھيني کان بجلي جي مڪمل بندش خلاف علائقي واسين گرڊ اسٽيشن آڏو احتجاجي مظاهرو ڪري ڌرڻو هنيو. احتجاج ۾ عورتن، بزرگن ۽ نوجوانن وڏي تعداد ۾ شرڪت ڪئي ۽ سخت نعريبازي ڪئي.مظاهرو ڪندڙن جو چوڻ هو ته لڳاتار هڪ مهيني کان بجلي بند هجڻ ڪري روزاني زندگي سخت متاثر ٿي آهي. رمضان المبارڪ جي آمد ويجهي آهي، پر گهرن ۾ اوندهه ڇانيل آهي. هنن چيو ته بجلي نه هجڻ سبب پاڻي جي به سختن کوٽ پيدا ٿي وئي آهي، ڇاڪاڻ⁠تہ گهڻن علائقن ۾ پاڻي موٽرن ذريعي حاصل ڪيو ويندو آهي. پاڻي نه هجڻ ڪري عورتن ۽ ٻارن کي سخت تڪليفن کي منهن ڏيڻو پئجي رهيو آهي.علائقي واسين الزام لڳايو ته گڏاپ ٻهراڙين ۾ قائم گرڊ اسٽيشن مان بحريا ٽائون کي بجلي فراهم ڪئي پئي وڃي، جڏهن⁠تہ ته مقامي آباديون بجلي جهڙي بنيادي سهولت کان محروم آهن. مظاهرين چيو ته هو صدين کان هتي آباد آهن، پر کين نظرانداز ڪيو پيو وڃي ۽ انسان به نه سمجهيو پيو وڃي.ڌرڻي دوران رهواسين مطالبو ڪيو ته فوري طور بجلي بحال ڪئي وڃي، پاڻي جي فراهمي يقيني بڻائي وڃي ۽ ديھي علائقن سان امتيازي سلوڪ بند ڪيو وڃي. هنن خبردار ڪيو ته جيڪڏهن سندن جائز مطالبا تسليم نه ڪيا ويا ته احتجاج جو دائرو وڌايو ويندو.ٻئي پاسي لاڳاپيل ادارن پاران اڃا تائين ڪو واضع مؤقف سامهون ناهي آيو. رهواسين اعليٰ اختيارين کان نوٽيس وٺي رمضان المبارڪ کان اڳ بجلي جي مستقل بحالي جو مطالبو ڪيو آهي۔