ملير: گڏاپ جا صدين پراڻا ڳوٺ بنيادي سهولتن کان محروم، رهواسين جو احتجاج

ملير (رپورٽ: عبدالرشيد مورجھريو) ملير ضلعي جي گڏاپ تعلقي ۾ واقع صدين پراڻا ڪيترائي ڳوٺ اڄ تائين بجلي ۽ پيئڻ جي صاف پاڻي جهڙين بنيادي سهولتن کان محروم آهن. گڏاپ پاور هائوس جي بلڪل ويجهو هجڻ باوجود ٿڌو ڊيم وارن علائقن سميت ڪيترن ڳوٺن ۾ بجلي جو هڪ پول به لڳائي نه سگهيو آهي، جڏهن ته پاڪستان بڻجڻ کان اڳ آباد ٿيل انهن ڳوٺن ۾ پاڻي جي فراهمي جو به ڪو بندوبست ناهي. متاثر ڳوٺن ۾ پارپيو گوندر ڳوٺ، حيات ڳوٺ، نوشيروان گوندر ڳوٺ، آدم گبول ڳوٺ، روزي گوندر ڳوٺ، ربو ڳوٺ، انڙ ڳوٺ، قادو ڳوٺ، مير خان گوندر ڳوٺ ۽ امام بخش گوندر ڳوٺ شامل آهن، جتي رهواسين جو چوڻ آهي ته انهن سان هميشه غيرن جهڙو سلوڪ ڪيو ويو آهي. ڳوٺاڻن جو چوڻ آهي ته هي علائقو هميشه پاڪستان پيپلزپارٽي کي ووٽ ڏيندو رهيو آهي، ۽ هر اليڪشن ۾ پيپلزپارٽي جا ايم پي ايز ۽ ايم اين ايز وڏي اڪثريت سان ڪامياب ٿيندا آهن. اليڪشن مهم دوران بجلي، پاڻي ۽ ٻين سهولتن جا وعدا ڪيا ويندا آهن، پر ڪاميابي بعد نمائندا نظر ناهن ايندا، ۽ ٻيهر صرف ايندڙ اليڪشن ۾ نون وعدن سان ديدار ٿيندو آهي. ان موقعي تي خدا بخش گوندر، فضل گوندر، علي مراد برفت، رفيق گبول، اشرف گوندر ۽ ٻين صحافين اڳيان دانهن ڪندي چيو ته “ڇا اسان پيپلزپارٽي جا ووٽر ناهيون؟ جيڪڏهن آهيون ته پوءِ اسان کي بنيادي انساني حقن کان ڇو محروم رکيو ويو آهي؟” رهواسين مطالبو ڪيو آهي ته حڪومتي نمائندا صرف ووٽن لاءِ نه، پر عملي طور به علائقي جي مسئلن تي ڌيان ڏين ۽ ترت بنيادن تي بجلي ۽ پاڻي جهڙيون سهولتون مهيا ڪيون وڃن، ٻي صورت ۾ هو احتجاج جو حق محفوظ رکن ٿا.