ملير ڪورٽ جي احاطي ۾ باهه، فرنيچر سڙي رک ٿي ويو

ملير (رپورٽ: عبدالرشيد مورجھريو)ملير ڪورٽ جي احاطي ۾ اوچتو باهه ڀڙڪي پئي جنهن جي نتيجي ۾ موجود فرنيچر سڙي رک ٿي ويو. واقعي کان پوءِ عدالت جي احاطي ۾ سخت خوف ۽ هراس پکڙجي ويو.ريسكيو 1122 جي ترجمان موجب سينٽرل ڪمانڊ اينڊ ڪنٽرول کي ملير ڪورٽ ۾ باهه لڳڻ جي اطلاع ملندي ئي فائر اينڊ ريسڪيو ٽيم ايمبولينس ۽ فائر بريگيڊ سان گڏ فوري طور واقعي واري هنڌ رواني ڪئي وئي ۽ ٽيم پهچي باهه وسائڻ جون ڪوششون شروع ڪيون. ان دوران باهه شدت اختيار ڪري وئي ۽ اتي موجود سموري فرنيچر کي پنهنجي لپيٽ ۾ وٺي ڇڏيو.اکين ڏٺن شاهدن موجب باهه لڳڻ کان پوءِ ڪافي دير سان فائر بريگيڊ پهتي، جنهن سبب وڪيلن ۽ عدالتي عملي پنهنجي مدد پاڻ تحت باهه وسائڻ جي ڪوششون ڪيون. باهه جي شدت سبب ڪورٽ جي احاطي مان دونهون نڪرندو رهيو، جنهن ڪري عدالت اندر افراتفري واري صورتحال پيدا ٿي وئي. باهه لڳڻ جا سبب هن وقت تائين معلوم نه ٿي سگهيا آهن، جڏهن ته واقعي بابت وڌيڪ جاچ جاري آهي.