ڏوڪري ۾ مهانگو ۽ گهٽ مقدار پئٽرول ڏيندڙ پئٽرول پمپ مالڪن خلاف ڪارروائي

اسسٽنٽ ڪمشنر ڏوڪري فرزانه ميراڻي ۽ اسسٽنٽ مختيارڪار ڪامران ضمير منگي پاران پئٽرول پمپن جا دورا

ڏوڪري(اطهر ميمڻ) ڏوڪري شھر ۾ پيٽرول پمپ مالڪن طرفان پيٽرول جو وڌيڪ اگھ وٺڻ ۽ گھٽ مقدار ڏيڻ خلاف شهرين جي شڪايتن تي ڏوڪري جي انتظاميه حرڪت ۾ اچي وئي، اسسٽنٽ ڪمشنر ڏوڪري فرزانه ميراڻي ۽ اسسٽنٽ مختيارڪار ڪامران ضمير منگي پيٽروليم، پوليس ۽ روينيو ٽيم کي ساڻ ڪري شهر جي مختلف هنڌن تي قائم پيٽرول پمپن جو دورو ڪيو ويو. ڏوڪري ۾ قائم پيٽرول پمپن مان ڪجھ پمپن تي ھڪ پوائنٽ گھٽ ڏيڻ تي اسسٽنٽ ڪمشنر فرزانه ميراڻي مٿن 50 ھزار روپيا ڏنڊ ھنيو. ان موقعي تي اي سي ڏوڪري پيٽرول مالڪن ۽ عملي کي سختي سان هدايتون جاري ڪيون ته سرڪار طرفان مقرر ڪيل اگھ توڙي پيٽرول جي صحيح مقدار جي فراهمي کي يقيني بڻايو وڃي، ٻي صورت ۾ خلاف ورزي ڪندڙ پيٽرول پمپ مالڪن خلاف انتظاميه سخت ڪاروائي ڪندي سندن لائيسنس منسوخ ڪيو ويندو. صحافين سان ڳالھائيندي اسسٽنٽ ڪمشنر ڏوڪري فرزانه ميراڻي چيو ته ڏوڪري تعلقي اندر حڪومت طرفان مقرر ڪيل اگھ ۽ مقدار ۾ گھٽتائي بابت شھرين جي شڪايتن تي ڪارروائي ڪندي ڏوڪري جي پيٽرول پمپن تي تيل معيار، اگھ ۽ مقدار جو جائزو ورتو، ڪجھ پيٽرول پمپ مالڪن طرفان عوام کي ھڪ پوائنٽ گھٽ ڏيڻ تي مٿن 50 ھزار ڏنڊ ھڻندي کين وارننگ جاري ڪئي آھي. هوڏانهن اي سي ڏوڪري جي اهڙي عمل جي شهرين طرفان ساراھ ڪئي وئي آھي.