اسٽيل ملز مان لوهه جي چوري جي الزام هيٺ 6 ڄڻا گرفتار، ٽرڪ هٿ

پوليس ڳجهي اطلاع تي ڪارروائي ڪندي اسٽيل ملز مان چوري ۾ ملوث گروهه کي گرفتار ڪيو: ڊاڪٽر عبدالخالق

ملير (رپورٽ: عبدالرشيد مورجھريو)بن قاسم پوليس پاڪستان اسٽيل ملز مان ڪروڙين رپين جي قيمتي مشينري ۽ ڌاتن جي چوري ۾ ملوث منظم گروهه خلاف وڏي ڪارروائي ڪندي ڇهن جوابدارن کي گرفتار ڪري ورتو، جڏهن ته چوري ٿيل سامان جي ترسيل ۾ استعمال ٿيندڙ 22 ويلر ٽرڪ پڻ قبضي ۾ ورتو ويو آهي۔ايس ايس پي ملير ڊاڪٽر عبدالخالق موجب پوليس کي ڳجهي اطلاع ملي هئي، جنهن جي بنياد تي ڪارروائي ڪندي اسٽيل ملز اندر چوري ۾ ملوث گروهه کي گرفتار ڪيو ويو۔ گرفتار ٿيل جوابدارن ۾ اسٽيل ملز جا ملازم پڻ شامل آهن، جيڪي اندروني سهولتڪاري ذريعي پلانٽ جي قيمتي مشينري ۽ لوهي کي ٻاهر منتقل ڪري رهيا هئا۔ايس ايس پي ملير ٻڌايو ته گرفتار جوابدار نديم حسين هن گروهه جو مرڪزي ڪردار آهي، جيڪو چوري ٿيل سامان جي سهولتڪاري ۽ وڪري ۾ ملوث هو، جڏهن ته ٻين گرفتار جوابدارن ۾ نصار، عبدالوحيد، لياقت خان، زاهد خان ۽ خالد شام شامل آهن۔پوليس موجب گرفتار جوابدارن وٽان برآمد ٿيل سمورو لوهو ۽ مشينري اسٽيل ملز جي پلانٽ سان تعلق رکي ٿي۔ ڪارروائي دوران پوليس 36 هزار ڪلوگرام کان وڌيڪ (36 ٽن) وزن وارو چوري ٿيل مشينري ۽ لوهي جو سامان برآمد ڪيو، جنهن جي ماليت ڪروڙين رپين ۾ ٻڌائي پئي وڃي۔پوليس جو چوڻ آهي ته جوابدار چوري ٿيل سامان 22 ويلر ٽرڪ ذريعي مختلف گودامن تائين منتقل ڪندا هئا، جتان ان کي وڪرو ڪيو ويندو هو، جڏهن ته ٻين جوابدارن هن عمل ۾ سهولتڪاري فراهم ڪئي۔گرفتار جوابدارن خلاف قانون موجب ڪيس داخل ڪري وڌيڪ جاچ شروع ڪئي وئي آهي، جڏهن ته هن منظم نيٽ ورڪ ۾ شامل ٻين ممڪن سهولتڪارن ۽ خريدارن جي ڳولا پڻ جاري آهي.