نوشهروفيروز پوليس جي مبينا زيادتين خلاف عورتن جو پاڪ ڪتاب کڻي احتجاج

ٺاروشاھ جي ٻٻر پاڙي واسڻ گل بانو سولنگي جو پوليس تي سندس مڙس کي گم ڪرڻ جو الزام

نوشهرو فيروز (ڊر) نوشهروفيروز پوليس جي زيادتين خلاف عورتن پاڪ ڪتاب کڻي پريس ڪلب نوشهروفيروز آڏو احتجاج ڪيو. ٺاروشاھ جي ٻٻر پاڙي جي رهواسي عورتن پاڪ ڪتاب کڻي نوشهروفيروز پوليس خلاف ٿاڻي ۽ پريس ڪلب نوشهروفيروز آڏو احتجاجي مظاھرو ڪيو. ان موقعي تي عورت گل بانو سولنگي چيو ته پوليس بنا ڏوهه جي محمد حنيف کي گرفتار ڪري گم ڪري ڇڏيو آهي ۽ کيس ظاهر به نه ٿو ڪيو وڃي. ھن چيو ته پوليس بنا جواز چادر چوديواري جو تقدس پائمال ڪندي گھر ۾ گھڙي مڙس کي گرفتار ڪري گم ڪيو آھي ۽ پوليس گرفتار مڙس سان ملڻ به نه ٿي ڏئي. اسان سان وڏو ظلم ڪيو ويو آهي اسين مسڪين پورهيت آهيون. ھن چيو ته فوري طور بنا جواز گرفتار حنيف سولنگي کي بازياب ڪرايو وڃي ٻئي صورت ۾ سخت احتجاج جو دائرو وڌايو ويندو.