گڏاپ ۾ ڪرڙ پير جي پرسرار جڳهه، واقعات ۽ حادثا ڳجهارت بڻجي ويا

ملير (رپورٽ: عبدالرشيد مورجھريو)گڏاپ روڊ تي بنديچہ اسٽاپ ۽ گڏاپ سٽي جي وچ ۾ واقع درگاهه ڪرڙ پير علائقي ۾ پيش ايندڙ پرسرار حادثن سبب مقامي آبادي تشويش ۾ مبتلا آهي۔ هن مقام تي گاڏين جا حادثا معمول بڻجي ويا آهن، جن ۾ ڪيترائي ماڻهو جان وڃائي ويٺا يا شديد زخمي ٿيا آهن۔درگاهه تي موجود خدمتگار هوندن جوکيو سان جڏهن هن ڳجهارت بابت پڇا ڪئي وئي ته هن ٻڌايو ته گهڻو ڪري اهڙا حادثا انهن ماڻهن سان پيش اچن ٿا، جيڪي نشي جي حالت ۾ هتان گذرندا آهن۔ سندس چوڻ ۾ ڪجهھ حد تائين سچائي نظر اچي ٿي، پر حقيقت اها به آهي ته ڪيترائي حادثا اهڙن ماڻهن سان پڻ ٿيا آهن، جيڪي زندگي ۾ ڪڏهن نشو به نه ڪندا هئا۔حادثي مان محفوظ بچندڙ ڪجهه ماڻهن جو چوڻ آهي ته کين اوچتو تيز هوا جو ڌڪ لڳو، جڏهن ته ڪجهه ٻين جو بيان آهي ته سندن گاڏي سامهون اوچتو ڪتو اچي ويو، جنهن سبب توازن بگڙي پيو۔ دلچسپ ڳالهه اها آهي ته جنهن هنڌ تي اهي حادثا ٿين ٿا، اهو روڊ مڪمل طور سڌو ۽ صاف نظر اچي ٿو، جنهن ڪري واقعن جو سبب سمجهڻ ڏکيو ٿي وڃي ٿو۔علائقي واسين جو چوڻ آهي ته ڪرڙ پير واري هن جڳهه تي ٿيندڙ بار بار حادثا هڪ ڳجهارت بڻجي ويا آهن ۽ هن بابت وڌيڪ جاچ ٿيڻ گهرجي ته جيئن حقيقت سامهون اچي سگهي ۽ مسافرن جي زندگين کي تحفظ ملي سگهي۔