ڊپٽي ڪمشنر نوشهروفيروز جي صدارت هيٺ پوليو بابت اجلاس

پوليو مهم دوران هڪ به ٻار ڦڙا پيئڻ کان نه رهڻ گهرجي: محمد ارسلان سليم

نوشهروفيروز (ڊ .ر) ڊپٽي ڪمشنر نوشهروفيروز محمد ارسلان سليم جي صدارت هيٺ سندس آفيس ۾ 15 کان 19 ڊسمبر 2025 تائين منعقد ٿيندڙ پوليو خلاف قومي مهم جي انتظامن کي آخري شڪل ڏيڻ لاءِ هڪ اجلاس منعقد ڪيو ويو.اجلاس ۾ ضلعي صحت آفيسر ڊاڪٽر غلام قادر چانڊيو، ضلعي مئنيجر پي پي ايڇ آءِ ڪيپٽن (ر) محسن علي، عالمي صحت تنظيم جو پي او ڊاڪٽر غلام علي سولنگي، ضلعي اطلاعات آفيسر قمر الزمان ڀنڀرو، فوڪل پرسن اي پي آءِ ڊاڪٽر عبدالستار بلال، ڪميونيڪيشن آفيسر علي اڪبر جوڻيجو، ڊاڪٽر وجي ڪمار ، سڀني تعلقن جا تعلقي سپروائيزر، اسسٽنٽ ڪمشنر ۽ ٻين لاڳاپيل عملدارن پڻ شرڪت ڪئي.گڏجاڻي کي خطاب ڪندي ڊپٽي ڪمشنر چيو ته سڀئي لاڳاپيل عملدار هن مهم دوران هر ممڪن ڪوشش ڪن ته جيئن پنجن سالن تائين جو ڪو به ٻار پوليو جا ڦڙا پيئڻ کان رهجي نه وڃي. هن ٽيمن جي بهتر نگراني ۽ مدد لاءِ هدايتون ڏنيون. هن چيو ته سڀئي لاڳاپيل ادارا صحت کاتي سان گڏ آھن ۽ پوليس فورس کي مهم دوران بهتر ڪردار ادا ڪرڻ جي هدايت ڪئي. ان کان اڳ صحت کاتي جي آفيسرن اجلاس کي پوليو مهم لاءِ ڪيل انتظامن بابت بريفنگ ڏني ۽ چيو ته مهم لاءِ ضلعي ۾ ڪل 1025 ٽيمون ٺاهيون ويون آهن جيڪي 342,312 ٻارن کي پوليو جا ڦڙا پيارينديون، جن ۾ 893 موبائل، 18 ايس ايم ٽي، 75 فڪسڊ ۽ 41 ٽرانزٽ ٽيمون شامل آهن، جن لاءِ ضلعي ۾ 68 ٽيم سپورٽ سينٽر قائم ڪيا ويا آهن. هن چيو ت پوليو مهم لاءِ سڀ ضروري انتظام مڪمل ڪيا ويا آهن. اجلاس کان پوءِ ڊپٽي ڪمشنر سول اسپتال نوشهره فيروز پهتو ۽ اتي ٻارن کي پوليو جا ڦڙا پياري قومي پوليو مهم جو افتتاح ڪيو