ملير ۾ مبينا اغوا ٿيل نينگري منيشا ڪماري جي بازيابي لاءِ سندس وارثن ۽ مهيشوري ايڪشن ڪميٽي پاران احتجاج

ملير (رپورٽ: عبدالرشيد مورجھريو)مهيشوري ايڪشن ڪميٽي ۽ اغوا ٿيل هندو نينگري منيِشا ڪماري جي وارثن پاران اڄ پريس ڪلب ٻاهران احتجاجي مظاهرو ڪيو ويو۔ مظاهرين جو چوڻ هو ته 2 ڊسمبر 2025 تي ٿاڻو سڪهن، ملير جي حدن مان اغوا ڪيل منيِشا ڪماري بابت ڊيڍ مهينو گذرڻ باوجود ڪا به ڄاڻ يا سراغ نه مليو آهي، جڏهن ته پوليس ۽ ٻيا قانون لاڳو ڪندڙ ادارا خاموش تماشائي بڻيل آهن۔مظاهري ۾ شرڪت ڪندڙن هٿن ۾ بينر ۽ پلي ڪارڊ کڻي منيِشا ڪماري جي بازيابي لاءِ نعرا هنيا۔ احتجاج ۾ عورتن ۽ ٻارن جي وڏي انگ ۾ شرڪت ڪئي، جنهن مان متاثر خاندان جي شديد تڪليف، غم ۽ بيچيني جو اظهار ٿيو۔مظاهري دوران آءِ جي سنڌ، وزيراعليٰ سنڌ ۽ ايس ايس پي ملير کان مطالبو ڪيو ويو ته منيِشا ڪماري کي فوري طور تي بازياب ڪرايو وڃي، اغوا ۾ ملوث جوابدارن کي گرفتار ڪري قانون جي ڪٽهڙي ۾ آندو وڃي ۽ متاثر خاندان کي انصاف فراهم ڪيو وڃي۔ مظاهرين جو چوڻ هو ته ڊيڍ مهيني جهڙي ڊگهي عرصي باوجود ڪا به اڳڀرائي نه ٿيڻ قانون لاڳو ڪندڙ ادارن جي ڪارڪردگيءَ تي وڏو سواليا نشان آهي۔احتجاج ۾ مهيشوري ايڪشن ڪميٽي جي اڳواڻ نجما مهيشوري، مڪيش ڪمار، رامجي جانجھا، ابومل، لالو ڏوهو، اجمل مهيشوري، ويراغ مل، ڊاڪٽر ونیش آريا، منيِشا جي والد سبھاگو سميت وڏي تعداد ۾ مردن، عورتن ۽ ٻارن شرڪت ڪئي۔مظاهري ۾ شرڪت ڪندڙن خبردار ڪيو ته جيڪڏهن منيِشا ڪماري کي جلد بازياب نه ڪرايو ويو ته احتجاج جو دائرو وڌيڪ وسيع ڪيو ويندو۔