ڊي سي سجاول زاهد رند جي صدارت هيٺ پراجيڪٽ ڊسٽرڪٽ ايڊوائزري ڪميٽي جو اجلاس

اجلاس ۾ ايڊيشنل ڊپٽي ڪمشنر ٽو محمد پيرل چانڊيو کان علاوه مختلف کاتن جي آفيسرن به شرڪت ڪئي

سجاول (رپورٽر) ڊپٽي ڪمشنر سجاول زاهد حسين رند جي صدارت هيٺ آغا خان ايجنسي فار هيبيٽيٽ پاران پراجيڪٽ ڊسٽرڪٽ ايڊوائزري ڪميٽي جو اجلاس دربار هال ۾ منعقد ٿيو. اجلاس ۾ ايڊيشنل ڊپٽي ڪمشنر ٽو محمد پيرل چانڊيو کان علاوه سوشل ويلفيئر، زراعت، ٻيلو کاتو، فشريز، تعليم، لائيو اسٽاڪ ۽ غير سرڪاري تنظيمن (اين جي اوز) سميت مختلف سرڪاري کاتن جي نمائندن شرڪت ڪئي. ان موقعي تي ڪنسلٽنٽ ٽيم پاران ڪوسٽل ريزيليئنس پلان (ساحلي مضبوطي جي منصوبي) بابت تفصيلي بريفنگ ڏني وئي ۽ شرڪت ڪندڙن کان تجويزون ۽ رايا پڻ طلب ڪيا ويا ته جيئن منصوبي کي وڌيڪ بهتر بڻائي سگهجي. اجلاس دوران شرڪت ڪندڙن ساحلي علائقن جي ترقي ۽ آفتن کان بچاءَ بابت اهم تجويزون پڻ پيش ڪيون. ڊپٽي ڪمشنر زاهد حسين رند اجلاس کي خطاب ڪندي چيو ته ساحلي علائقن ۾ موسمياتي تبديلي جي اثرن کي گهٽائڻ لاءِ مربوط ۽ پائيدار منصوبابندي ضروري آهي. هن چيو ته سمورن لاڳاپيل کاتن ۽ اسٽيڪ هولڊرن جي صلاح مشوري سان تيار ڪيل منصوبو ئي اثرائتو ٿي سگهي ٿو. هن ڪنسلٽنٽ ٽيم کي هدايت ڪئي ته اجلاس ۾ پيش ڪيل راين ۽ تجويزن کي منصوبي ۾ شامل ڪيو وڃي ته جيئن ان کي وڌيڪ بهتر ۽ ممڪن بڻائي سگهجي. ڊپٽي ڪمشنر چيو ته گڏيل ڪوششن سان ئي ساحلي علائقن ۾ رهندڙ ماڻهن جي زندگين کي محفوظ ۽ بهتر بڻائي سگهجي ٿو.