نوشھرو فيروز ۾ ضلعي سطح تي ڇوڪرن ۽ ڇوڪرين وچ ۾ ٽيبل ٽينس جا مقابلا

ضلعي جي سمورن تعلقن جي ڇوڪرن ۽ ڇوڪرين جي ٽيمن چيمپيئن شپ ۾ حصو ورتو

نوشهروفيروز (ڊ ر) سنڌ حڪومت جي راندين ۽ نوجوانن جي معاملن واري وزير ۽ سيڪريٽري جي خاص ھدايتن تي ضلعي اسپورٽس کاتي نوشهروفيروز پاران اسپورٽس ڪامپليڪس نوشھرو فيروز ۾ ضلعي سطح تي ڇوڪرن ۽ ڇوڪرين جي وچ ۾ ٽيبل ٽينس جا مقابلا منعقد ڪيا ويا . جنھن جي مھمان خاص گورنمينٽ گرلس ڪاليج مورو جي پرنسپال افشان بانو ڪانڌڙو ھئي ، جڏهن ته گورنمينٽ گرلز ڪاليج مورو جي اسپورٽس ڪوآرڊينيٽر ميڊم رابعه ، احسان ڪانڌڙو ، علي جواد سهيل احمد لاشاري (لارا) ۽ ٻين اعزازي مهمان طور شرڪت ڪئي . ان موقعي تي نوشهروفيروز ضلعي جي سڀني تعلقن جي ڇوڪرن ۽ ڇوڪرين جي ٽيمن چيمپيئن شپ ۾ پرجوش حصو ورتو . شاندار ڪارڪردگي ڏيکاري . ضلعي اسپورٽس آفيسر شهباز خان عباسي سڀني معزز مهمانن جي آجيان ڪئي ۽ کي اجرڪ ۽ ٻيا ثقافتي تحفا پيش ڪيا .تقريب دوران ٻارن لاءِ مختلف تفريحي سرگرميون پڻ منعقد ڪيون ويون ۽ ٻارن کي ٽيبل ٽينس ۽ ٻين راندين بابت آگاهي فراهم ڪئي وئي . ان موقعي تي پنهنجي خطاب ۾ ، مهمان خاص ٻارن کي راندين جي اهميت کان آگاهه ڪيو ۽ چيو ته شاگردن کي تعليمي سرگرمين سان گڏ راندين ۾ به ڀرپور حصو وٺڻ گهرجي . هن چيو ته نوشهروفيروز ضلعي ۾ سنڌ جي راندين ۽ نوجوانن جي معاملن واري کاتي پاران مسلسل بهترين راندين جا واقعا فراهم ڪيا پيا وڃن ، جنهن جي ڪري ٻارن کي قومي ۽ بين الاقوامي سطح تي پهچڻ جا موقعا ملي رهيا آهن . هن راندين واري کاتي جي انهن ڪوششن جي تعريف ڪئي ۽ چيو ته اهڙيون سرگرميون نوجوانن جي روشن مستقبل جي ضمانت آهن . آخر ۾ شرڪت ڪندڙن ، ڪوچز، استادن، والدين ۽ رانديگرن هن ڪامياب تقريب کي منعقد ڪرڻ تي سنڌ جي راندين ۽ نوجوانن جي معاملن واري کاتي ۽ ضلعي راندين جي انتظاميه جو شڪريو ادا ڪيو ۽ ان عزم جو اظهار ڪيو ته نوجوانن جي جسماني ۽ ذهني ترقي لاءِ مستقبل ۾ به اهڙا مقابلا جاري رکڻ گھرجن تہ جيئن تدريسي عمل سان گڏوگڏ صحت مند سرگرمين جي حوصلا افزائي ٿي سگھي . آخر ۾ ڪامياب ۽ بھترين ڪارڪردگي ڏيکاريندڙ شاگردن کي ٽرافيون ۽ تعريفي سرٽيفڪيٽ ڏنا ويا .