ملير: شاه لطيف ٽائون ۽ در محمد خروس ڳوٺ ۾ آپريشن، عملي تي پٿراءُ، قومي شاهراهه تي ڌرڻو

اينٽي انڪروچمينٽ ۽ پوليس پاران ڪارروائي دوران فٽ پاٿن ۽ ٻين هنڌن تي قائم ڪيبنون ۽ ريڙها هٽايا ويا، ڳوٺاڻن پاران مزاحمت

ملير(رپورٽ: عبدالرشيد مورجھريو) ملير جي شاه لطيف ٽائون ۽ در محمد خروس ڳوٺ ۾ اينٽي انڪروچمينٽ کاتي ۽ پوليس پاران غيرقانوني اڏاوتن خلاف ڪارروائي ڪئي وئي. ڪارروائي دوران فٽ پاٿن ۽ ٻين هنڌن تي قائم ڪيبنون ۽ ريڙها هٽايا ويا آپريشن دوران ڳوٺاڻن سخت مزاحمت ڪندي عملي تي پٿراءُ ڪيو جنهن سبب عملي ۾ ڀاڄ پئجي وئي واقعي بعد در محمد خروس ڳوٺ ۽ ڀرپاسي وارن علائقن جي ڳوٺاڻن قومي شاهراهه تي ڌرڻو هڻي روڊ بلاڪ ڪري ڇڏيو ۽سخت نعريبازي ڪئي ڌرڻي ۾ شريڪ ڳوٺاڻن الزام هنيو ته در محمد خروس ڳوٺ کي هٿ وٺي انتقامي ڪارروائين جو نشانو بڻايو پيو وڃي هوڏانهن ضلعي انتظاميه جو چوڻ آهي ته ڊپٽي ڪمشنر ملير جي هدايتن تي غيرقانوني اڏاوتن خلاف مرحليوار ڪارروائيون جاري آهن عملدارن موجب مزاحمت ڪندڙ پرامن شهري نه پر قبضه مافيا سان لاڳاپيل آهن، جن جي سرپرستي ۾ فٽ پاٿن ۽ روڊن تي قبضا ڪيا ويا هئا. انتظاميه موجب اهڙين قبضن خلاف ڪارروائيون مستقبل ۾ پڻ جاري رهنديون.