عمرڪوٽ ۾ خودڪشين جو وڌندڙ الميو، 2025ع دوران 67 واقعا رپورٽ

ضلعي انتظاميه چونڊيل نمائندن ۽ اين جي اوز جو ڪردار به سواليه نشان بڻيل

عمرڪوٽ (رپورٽ:ڪانجي مل رکيسر) عمرڪوٽ پوليس کاتي طرفان جاري ڪيل سالياني انگن اکرن موجب سال 2025ع دوران عمرڪوٽ ضلعي جي مختلف ٿاڻن جي حدن اندر خودڪشين جا گهٽ ۾ گهٽ 67 واقعا سرڪاري رڪارڊ تي آيا آهن، جڏهن ته مقامي ذريعن ۽ سماجي حلقن جو چوڻ آهي ته اصل انگ اکر هن کان ڪافي وڌيڪَ ٿي سگهن ٿا، ڇاڪاڻ⁠تہ ڪيترائي واقعا دٻايا ويا آهن يا سماجي دٻاءُ سبب ظاهر ئي ناهن ٿي سگهيا، پوليس رڪارڊ موجب خودڪشي ڪندڙن ۾ 40 مرد، 26 عورتون ۽ هڪ ٻار شامل آهي، 67 واقعن مان 64 واقعن ۾ فوتگين جي وارثن طرفان ڪا به قانوني ڪارروائي نه ڪرائي وئي، جڏهن ته صرف ٽن ڪيسن ۾ ايف آءِ آر داخل ٿي سگهي آهي، پوليس موجب وارثن پاران بيروزگاري، گهريلو اڻبڻت، غربت ۽ ذهني توازن درست نه هجڻ جهڙا سبب ڄاڻائي ڪيس بند ڪرايا ويا، جاري ڪيل انگن اکرن مطابق خودڪشي جا 56 واقعا اقليتي برادرين سان تعلق رکندڙ شهرين جا آهن، جن ۾ ڪولهي، اوڏ، ميگهواڙ، ڀيل سميت هندو برادري شامل آهي، جيڪو ضلعي ۾ سماجي ۽ معاشي ناانصافين ڏانهن به اشارو ڪري ٿو، سماجي حلقن ۽ شهري اڳواڻن سخت ڳڻتي جو اظهار ڪندي چيو آهي ته ضلع عمرڪوٽ ۾ خودڪشين جهڙي سنگين مسئلي تي اينجيوز جو ڪردار تقريبن زيرو نظر اچي ٿو، مقامي ماڻهن جو الزام آهي ته اينجيوز صرف ڪاغذن ۾ منصوبا ڏيکاري فنڊ هڙپ ڪن ٿيون، جڏهن⁠ تہ عملي طور نه ڪا مستقل آگاهي مهم هلائي وڃي ٿي ۽ نه ئي متاثر علائقن ۾ ماڻهن سان سنجيده ڪم ڪيو وڃي ٿو، شهري حلقن جو وڌيڪَ چوڻ آهي ته گهڻيون اينجيوز سال جي آخري مهيني ۾ رڳو خانگي يا رسمي پروگرام ڪرائي رپورٽون تيار ڪن ٿيون ته جيئن فنڊن جو حساب پورو ڪري سگهجي، پر خودڪشين جي اصل سببن، ذهني صحت، بيروزگاري ۽ گهريلو مسئلن تي ڪو به اثرائتو يا ميدان ۾ نظر ايندڙ قدم ناهي کنيو ويو، سماجي اڳواڻن موجب سرڪاري انگ اکر صرف انهن واقعن تي ٻڌل آهن جيڪي پوليس رڪارڊ ۾ اچي سگهيا، جڏهن تہ ڪيترائي واقعا بدنامي، غربت ۽ دٻاءُ سبب ظاهر ئي ناهن ٿيا، هنن حڪومت، ضلعي انتظاميه ۽ لاڳاپيل ادارن کان مطالبو ڪيو آهي ته اينجيوز جي ڪردار جي به جاچ ڪئي وڃي، خودڪشين جي اصل سببن تي تحقيق ڪرائي وڃي ۽ حقيقي بنيادن تي آگاهي مهمون، نفسياتي سهڪار ۽ روزگار جا موقعا فراهم ڪيا وڃن، جيئن هن وڌندڙ انساني الميي کي روڪي سگهجي.