عمرڪوٽ ۾ ارڙي جي ويڪسين مهم بابت اجلاس ٿي گذريو

17نومبر کان شروع ٿيندڙ ارڙي مهم بابت انتظامن جو جائزو ورتو ويو

عمرڪوٽ (رپورٽ:ڪانجي مل رکيسر) ڊپٽي ڪمشنر عمرڪوٽ نويدُ الرحمان لاڙڪ جي صدارت هيٺ ضلعي عمرڪوٽ ۾ 17 نومبر کان 29 نومبر 2025ع تائين هلندڙ ارڙي جي ويڪسين مهم بابت هڪ اهم اجلاس ڊپٽي ڪمشنر آفيس جي درٻار ھال ۾ منعقد ٿيو، اجلاس ۾ صحت کاتي جا آفيسر، اي پي آءِ (Expanded Programme on Immunization) جا نمائندا ۽ لاڳاپيل ادارن جا آفيسر شريڪ ٿيا، ان موقعي تي اجلاس دوران اي پي آءِ جي فوڪل پرسن ڊاڪٽر شير مھر ضلعي عمرڪوٽ ۾ جاري ارڙي جي ويڪسين مهم بابت تفصيلي بريفنگ ڏني، هن ٻڌايو ته مهم دوران سموري ضلعي ۾ 6 مهينن کان 59 مهينن تائين جي عمر جي ٻارن کي ارڙي جي بيماري کان بچاءَ جي ويڪسين ڏني پئي وڃي ته جيئن بيماريءَ جي پکڙجڻ کي مؤثر طريقي سان روڪي سگهجي، ان موقعي تي ڊاڪٽر شير مھر وڌيڪ چيو ته مهم جي ڪاميابي لاءِ صحت کاتي جون ٽيمون گهر گهر وڃي ٻارن کي ويڪسين ڏئي رهيون آهن، جڏهن⁠ تہ والدين ۾ آگاهي پيدا ڪرڻ لاءِ مختلف سرگرميون پڻ جاري آهن، ھن ٻڌايو ته ھن مهم ۾ ڪل 241 سوشل موبلائيزر، 35 سپروائيزر ۽ 103 آئوٽ ريچ ٽيمون حصو وٺي رهيون آهن، ان موقعي تي ڊپٽي ڪمشنر عمرڪوٽ نويدُ الرحمان لاڙڪ سڀني لاڳاپيل کاتن کي ھدايت ڪئي ته هو ھن ويڪسين مهم کي ڪامياب بڻائڻ لاءِ ڀرپور ڪردار ادا ڪن ۽ ڪو به ٻار ويڪسين کان محروم نه رهي، هن چيو ته ٻارن جي صحت حڪومت جي اولين ترجيح آهي، تنهنڪري سڀ ٽيمون پنهنجي ڪارڪردگي وڌيڪ بهتر ڪن، ان موقعي تي اجلاس ۾ مهم جي ڪارڪردگي، درپيش مسئلن ۽ ايندڙ لائحه عمل تي به تفصيلي غور ڪيو ويو، ان موقعي تي اجلاس ۾ ايڊيشنل ڊپٽي ڪمشنر ٽو عمران، اسسٽنٽ ڪمشنر سامارو و پٿورو سنجي ڪمار ترڪيو، اسسٽنٽ ڪمشنر ڪنري محمد خان، ڊائريڪٽر پرائيوٽ اسڪول محمد خان، اي ڊي ايڇ او ڊاڪٽر لڇمن داس، ايم ايس سول اسپتال عمرڪوٽ ڊاڪٽر فريد احمد، ڊپٽي ڊائريڪٽر سوشل ويلفيئر نور محمد شيخ، ڊسٽرڪٽ انفارميشن آفيسر عمرڪوٽ محمد اسلم ڀٽي، ڊسٽرڪٽ فوڪل پرسن اي پي آئي ڊاڪٽر شير مھر، پوليو جي فوڪل پرسن ڊاڪٽر وجئہ ڪمار، ڊي ايم پي پي ايچ آئي شرف الدين ميمڻ سميت ٻين لاڳاپيل کاتن جا عملدار پڻ موجود هئا.