ملير ۾ قومي عوامي تحريڪ يونٽ جي ريلي، ڳوٺن کي بنيادي سهولتون ۽ ليز ڏيڻ جو مطالبو

فرحان لاڙڪ، فياض اتيرو، جنسار هيسباڻي، هريرام چوھاڻ، ساجد گوريلو ۽ سڪندر شورو جي اڳواڻي ۾ ريلي ڪڍي وئي

ملير (رپورٽ: عبدالرشيد مورجھريو) قومي عوامي تحريڪ يونٽ داؤد شورو ڳوٺ ۾ قومي عوامي تحريڪ جي اڳواڻن، فرحان لاڙڪ، فياض اتيرو، جنسار هيسباڻي، هريرام چوھاڻ، ساجد گوريلو ۽ سڪندر شورو جي اڳواڻي ۾ احتجاجي ريلي چوڪنڊي قبرستان کان سيد چوڪ تائين ٿي ڪڍي وئي . ريلي ۾ ڳوٺاڻا وڏي انگ ۾ شرڪت ڪئي ۽ علائقي جي بنيادي مسئلن خلاف احتجاج رڪارڊ ڪرايو.اڳواڻن ميڊيا سان ڳالهائيندي چيو ته ملير جي ڳوٺن جون ليز ختم ڪري سنڌي ماڻهن کان ڳوٺن جا مالڪاڻا حق واپس نه ڪيا ويا آهن، جنهن سبب مقامي رهواسي نااميد ۽ مظلوم بڻيل آهن. انهن زور ڏنو ته ملير جي ڳوٺن ۾ چونڊيل نمائندا پاڻي، سيوريج، روڊ، تعليم ۽ صحت جهڙيون بنيادي سهولتون مهيا ڪرڻ ۾ ناڪام رهيا آهن اڳواڻن منشيات جي سرعام وڪري خلاف پڻ آواز بلند ڪيو ۽ چيو ته نوجوان نسل کي منشيات جي زهر کان بچائڻ لاءِ سخت قدم کنيا وڃن. انهن الزام لڳايو ته ايس ايس پي ملير ۽ ايس ايڇ او شاهه لطيف منشيات وڪرو ڪندڙن کان ڀتو وصول ڪن ٿا، جنهن سبب ملير ۾ منشيات جو ڪاروبار وڌي رهيو آهي قومي عوامي تحريڪ يونٽ جا اڳواڻ واضح ڪيو ته جيڪڏهن ملير جي ڳوٺن کي بنيادي سهولتون ۽ ليز نه ڏنيون ويون ته تحريڪ جو دائرو وسيع ڪيو ويندو ۽ احتجاجي ڪاروايون جاري رهنديون. ريلي امن ۽ ضابطي سان ختم ڪئي وئي، جڏهن ته اڳواڻن مقامي انتظاميه ۽ اعليٰ اختيارين کان جلد عملي قدم کڻڻ جي اپيل ڪئي۔