عمرڪوٽ ۾ به پيپلزپارٽي جي 58هين يومِ تاسيس تي شاندار جلسو، جيالن جو وڏو ميڙ

جلسي ۾ ڊاڪٽر نور علي شاه، نواب تيمور ٽالپر، حاجي محمد بقا پلي، صوفي نواز، ميان خالد ولهاري ۽ ٻيا به شريڪ

عمرڪوٽ (رپورٽ:ڪانجي مل رکيسر) پاڪستان پيپلزپارٽي ضلعي عمرڪوٽ پاران پارٽي جي 58هين يومِ تاسيس جي موقعي تي برهان الدين ڪنڀر هائوس عمرڪوٽ ۾ شاندار جلسو ڪوٺايو ويو، جتي چيئرمين بلاول ڀٽو زرداري جي لائيو خطاب ڏسڻ لاءِ وڏي اسڪرين لڳائي وئي، جيالن وڏي انگ ۾ شرڪت ڪري پارٽي سان پنهنجي ساڃاهه، محبت ۽ وابستگي جو شاندار اظهار ڪيو، تقريب جي پڄاڻي تي يومِ تاسيس جو ڪيڪ پڻ ڪاٽيو ويو، جلسي ۾ ضلعي صدر ڊاڪٽر نور علي شاه ،پ پ پ ايم پي اي نواب تيمور ٽالپر، ضلعي چئيرمين حاجي محمد بقا پلي، جنرل سيڪريٽري صوفي نواز، ضلعي ڪائونسل جي وائيس چئيرمين ميان خالد ولهاري، چيئرمين ميونسپل ڪميٽيءَ عمرڪوٽ حاجي خالد سراج سومرو، سينيئر نائب صدر برهان ڪنڀر، پيپلزپارٽي انفارميشن سيڪريٽري گھنشام بجير،ڊپٽي انفارميشن سيڪريٽري ڪامريڊ نندلال ميگهواڙ. شڪيل باجوہ، چاڪر مري، عبداللہ کوسو، ڪانجي مل ميگھواڙ، منٺار آريسر سميت ضلعي عهديدارن، ضلعي ڪائونسل ميمبرن، يوسي چئيرمينن ۽ عوام وڏي تعداد ۾ شرڪت ڪئي، اڳواڻن خطاب ڪندي چيو ته اڄ پوري ملڪ ۾ پيپلزپارٽي جي 58هين يومِ تاسيس جي موقعي تي لکين ماڻهون گڏ ٿي پارٽي سان پنهنجو عشق ۽ وابستگي جو ثبوت ڏئي رهيا آهن، پيپلزپارٽي هڪ خالص عوامي ۽ جمهوري پارٽي آهي، جنهن جون پاڙون هن ملڪ جي ماڻهن جي دلين ۾ کوٽل آهن، ڪابه طاقت، لالچ يا دٻاءُ جيالن کي پارٽي کان ڌار نٿي ڪري سگهي، اڳواڻن وڌيڪَ چيو ته 58 سال اڳ قائدِ عوام شهيد ذوالفقار علي ڀٽو پيپلزپارٽي جو بنياد رکيو، ۽ شهيدن پنهنجي رت سان پارٽي کي زنده رکيو، پيپلزپارٽي اڄ به عوام جي دلين ۾ ڌڙڪي ٿي ۽ هميشه رهندي، هن پارٽي جو سفر هڪ اهڙو درياهه آهي جيڪو سدائين وهندو رهندو، ڪنهن جي اچڻ يا وڃڻ سان هن جي لهرن ۾ ڪابه گهٽتائي نٿي اچي، اڳواڻن چيو ته شهيد ذوالفقار علي ڀٽو ۽ شهيد راڻي بينظر ڀٽو جو نظريو ۽ مشن اڄ چيئرمين بلاول ڀٽو زرداري ۽ ڪو چيئرمين آصف علي زرداري اڳتي وڌائي رهيا آهن، ملڪ کي بحران مان آصف علي زرداري ڪڍيو، ۽ پيپلزپارٽي اڄ به عوام جي اميدن ۽ اعتماد جو مرڪز بڻيل آهي، جلسو جوش، جذبي ۽ نعريبازي سان پڄاڻيءَ تي پهتو.