سامارو ۽ سي آءِ اي پوليس جي ڪارروائي، 4 ڄڻا گرفتار ڪرڻ جي دعويٰ

گهرن ۾ ڌاڙا هڻندڙ ٽولي جي ٽن جوابدارن کي هڪ سهولتڪار سميت گرفتار ڪري ورتو: پوليس

عمرڪوٽ (رپورٽ:ڪانجي مل رکيسر) عمرڪوٽ ايس ايس پي عزير احمد ميمڻ جي خاص هدايتن تي سي آءِ اي پوليس عمرڪوٽ ۽ سامارو پوليس گڏيل ڪارروايون ڪندي مختلف علائقن ۾ لڳل ڌاڙن ۾ ملوث خطرناڪ گروھ جي ٽن جوابدارن سميت هڪ سهولتڪار کي گرفتار ڪري ورتو، پوليس موجب ڪجهه ڏينهن اڳ سامارو ٿاڻي جي حد مان ميوارم مالهي، بودرفارم ٿاڻي جي حد مان عمر چيما ۽ ڪوٽ غلام محمد ٿاڻي جي حد مان پرڀو ميگهواڙ جي گهرن تي لڳل ڌاڙن ۾ ملوث جوابدار راشد پٽ نورنگ بنگلاڻي، رجب پٽ ميان بخش بنگلاڻي، محمد رحيم عرف پپو بنگلاڻي ۽ سندن سهولتڪار ڌارشي پٽ ڏيوسي ڪولهي کي گرفتار ڪيو ويو، پوليس ٻڌايو ته گرفتار جوابدارن وٽان وڏي مقدار ۾ ڌاڙن دوران کنيل سامان هٿ آيو آهي، جن ۾ 50 هزار روپيا ڪيش، هڪ ڪلو چاندي جا زيورا، پسٽل، 50 هزار روپيا ڪيش ۽ عمر چيما جي گهران کنيل موبائيل فون شامل آهن، ساڳئي وقت سامارو وارن ڌاڙن دوران کنيل سونا زيورا، هٿيار ۽ روڪ رقم پڻ رڪور ڪيا ويا آهن، پوليس موجب جوابدار ڌارشي ڪولهي گروھ کي سهولت فراهم ڪندو رهيو، جيڪو اڳ به ٽرانسفارمر چوري جي وارداتن ۾ ملوث رهيو آهي، سندس قبضي مان ٽرانسفارمر چوري واريون ڪوئلون پڻ هٿ ڪيون ويون، سي آءِ اي ۽ ٽيڪنيڪل ٽيم جي مدد سان جوابدارن کي جيو فنسنگ ذريعي ٽريس ڪري گرفتار ڪيو ويو، پوليس جو چوڻ آهي ته ساڳيو گروھ مختلف گهرن ۾ لڳل ڪيترن ئي ڌاڙن ۾ ملوث آهي، وڌيڪ جاچ جاري آهي ۽ وڌيڪ اهم ڏوھ سامهون اچڻ جا امڪان آهن.