اسٽيل ٽائون ۽ گلشن حديد ۾ پاڻي، بجلي، گئس ۽ ٻين سهولتن جي کوٽ خلاف ڌرڻو جاري

پيپلز ليبر بيورو جي اڳواڻ ڌڻي بخش سمون جي اڳواڻي ۾ اسٽيٽ ڊپارٽمينٽ جي آفيس اڳيان ٽن مهينن کان ڌرڻو جاري

ملير (رپورٽ: عبدالرشيد مورجھريو) اسٽيل ٽائون ۽ گلشن حديد ۾ پاڻي، بجلي، گئس سميت ٻين بنيادي سهولتن جي حل لاءِ پيپلز ليبر بيورو جي اڳواڻ ڌڻي بخش سمون جي اڳواڻي ۾ اسٽيٽ ڊپارٽمينٽ جي آفيس اڳيان ٽن مهينن کان جاري ڌرڻي ۾، ملير جي سيٽ تان ڪامياب سنڌ بار ڪائونسل جي چونڊيل ميمبر ايڊووڪيٽ رياض ڀٽي پهچي مزدورن سان يڪجهتي جو اظهار ڪيو.ان موقعي تي مير عباس ۽ رياض ڀٽي خطاب ڪندي چيو ته مزدورن ۽ علائقي واسين جا مسئلا سالن کان حل طلب آهن پر لاڳاپيل ادارا پنهنجون ذميواريون نڀائڻ بدران بي حسي اختيار ڪري ويٺا آهن. هنن چيو ته پاڻي، بجلي ۽ گئس جهڙيون بنيادي سهولتون فراهم ڪرڻ رياستي ذميواري آهي، پر اسٽيل ٽائون ۽ گلشن حديد جا رهاڪو روزانو اذيتن مان گذري رهيا آهن هنن زور ڀريو ته جيڪڏهن مسئلا فوري طور حل نه ڪيا ويا ته احتجاج جو دائرو وڌايو ويندو ۽ قانوني توڙي سياسي محاذ تي سخت قدم کنيا ويندا. رياض ڀٽي چيو ته سنڌ بار ڪائونسل جا چونڊيل ميمبر هر فورم تي مزدورن جو آواز بڻجي سندن حقن لاءِ جدوجهد ڪندا آخر ۾ ڌڻي بخش سمون ۽ ٻين اڳواڻن مطالبو ڪيو ته پاڻي، بجلي، گئس ۽ اسٽريٽ ڊپارٽمينٽ جي انتظامي نظام کي فوري بحال ڪري عوام کي رليف ڏنو وڃي، ٻي صورت ۾ احتجاج جاري رهندو.