سینیٹ میں 27ویں آئینی ترمیم کی منظوری

ایوانِ بالا نے دو تہائی اکثریت سے 27ویں آئینی ترمیمی بل منظور کرلیا

اسلام آباد: ایوانِ بالا نے دو تہائی اکثریت سے 27ویں آئینی ترمیمی بل منظور کرلیا۔ وفاقی وزیر قانون اعظم نذیر تارڑ نے ترمیمی بل پیش کیا، جس پر ایوان میں ووٹنگ ہوئی۔ اس دوران پاکستان تحریک انصاف کے بعض ارکان نے چیئرمین سینیٹ کے ڈائس کے سامنے احتجاج کیا، تاہم سیف اللہ ابڑو اپنی نشست پر بیٹھے رہے اور احتجاج میں شامل نہ ہوئے۔ بعد ازاں انہوں نے ترمیمی بل کے حق میں ووٹ دیا۔ جمعیت علمائے اسلام کے احمد خان نے بھی ترمیم کے حق میں ووٹ دیا۔ ایوان کے 64 ارکان نے مرحلہ وار 59 شقوں کی منظوری دی اور نشستوں سے کھڑے ہوکر ووٹنگ میں حصہ لیا۔ بل کی حتمی منظوری کے موقع پر سینیٹ ارکان نے لابیز میں جا کر ووٹ دیا، جس کے نتیجے میں 64 ووٹ ترمیم کے حق میں آئے جبکہ مخالفت میں کوئی ووٹ نہیں دیا گیا۔ چیئرمین سینیٹ یوسف رضا گیلانی نے رولنگ دیتے ہوئے اعلان کیا کہ 27ویں آئینی ترمیمی بل منظور کرلیا گیا ہے۔