گھگھر ۾ اي پي سي، بنيادي سهولتن جي کوٽ ۽ امن امان تي ڳڻتي، گڏيل جدوجهد جو اعلان

اي پي سي ۾ مولانا عبدالماجد نديم چاچڙ، جان محمد جاني ايڊووڪيٽ، رضا علي سنديلو ايڊووڪيٽ، رستم ميراڻي ۽ ٻِيا شريڪ

ملير (رپورٽ: عبدالرشيد مورجھريو) گھگھر ۾ پاڻي، بجلي ۽ ٻين بنيادي سهولتن جي کوٽ سان گڏ امن امان جي خراب صورتحال ۽ مغوي اڪرم زھراڻي جي آزادي لاءِ جمعيت علماءَ اسلام جي پليٽ فارم تان آل پارٽيز ڪانفرنس ڪوٺائي وئي جنهن ۾ سياسي، سماجي اڳواڻن ۽ شھرين وڏي تعداد ۾ شرڪت ڪئي مقامي هوٽل ۾ ٿيندڙ ڪانفرنس ۾ مولانا عبدالماجد نديم چاچڙ، قاري ثنا الله عثماني، صبغت الله لاکو پيپلز پارٽي شهيد ڀٽو، جان محمد جاني ايڊووڪيٽ، رضا علي سنديلو ايڊووڪيٽ، رستم ميراڻي عوامي تحريڪ ، ابراهيم کوکر، شمشاد زھراڻي جيئي ترقي پسند پارٽي ڊاڪٽر ملوڪ بگٽي، نظير زھراڻي، شير خان مير، ممتاز ڪانڌڙو، منور ڪانڌڙو، اويس ڪانڌڙو، مولانا عيسيٰ چاچڙ ۽ ٻين خطاب ڪيو.اڳواڻن چيو ته گھگھر ملير جو اهو بدنصيب علائقو آهي، جتي رهواسين کي بنيادي انساني حق به ناهن مليا. ٻن مهينن کان بجلي بند هجڻ سبب ڪاروبار ۽ روزگار ختم ٿي ويا آهن، پاڻي به ميسر ناهي، جڏهن ته شڪايت ڪرڻ تي گيس پڻ بند ڪئي وئي. تعليم ۽ صحت جون حالتون به انتهائي خراب آهن، جڏهن ته امن امان جي صورتحال ايتري بگڙيل آهي جو ڏينهن ڏٺي ماڻهو اغوا ڪيا وڃن ٿا. انهن چيو ته اڪرم زھراڻي ڪيترن ڏينهن کان ڌاڙيلن وٽ قيد آهي، پر پوليس اڃا تائين ڪو به اثرائتو قدم نه کنيو آهي.شرڪت ڪندڙن چيو ته هزارين ايڪڙ زمين وڪرو ڪرڻ باوجود اسڪول لاءِ هڪ ايڪڙ زمين به نه ڇڏي وئي آهي، جنهن سان علائقي جي پٺتي پيل هجڻ جو اندازو لڳائي سگهجي ٿو. ڪانفرنس ۾ گڏيل جدوجهد جو اعلان ڪندي طئي ڪيو ويو ته پهرين مرحلي ۾ بنيادي سهولتن جي فراهمي ۽ مغوي اڪرم زھراڻي جي آزادي لاءِ احتجاجي مظاهرا ڪيا ويندا.