سمنڊ ۾ پاڻي جو ڇوڙ فطري ضرورت آھي: اياز لطيف پليجو

ڪوٽڙي کان ھيٺ پاڻي نہ ڇڏڻ ۽ سمنڊ ۾ پاڻي جو ڇوڙ نہ ٿيڻ ڪري تمر جا ٻيلا ختم ٿي رھيا آھن

حيدرآباد(بيورو) قومي عوامي تحريڪ جي سربراھ اياز لطيف پليجي چيو آهي تہ سمنڊ ۾ پاڻي جو ڇوڙ فطري ضرورت آھي. ڪوٽڙي کان ھيٺ پاڻي نہ ڇڏڻ ۽ سمنڊ ۾ پاڻي جو ڇوڙ نہ ٿيڻ ڪري تمر جا ٻيلا ختم ٿي رھيا آھن. ڊيلٽا تباھ ٿي رھيو آھي. ساحلي پٽي جي لکين ايڪڙ زمين سمنڊ ڳڙڪائي ويو آھي. درياھ سمنڊ کي پوئتي ڌڪي ٿو. وفاق ۽ پنجاب پنھنجي ناڪامي، نااھلي ۽ ڪرپشن لاءِ سنڌ دشمن ملڪ دشمن منصوبي ڪالاباغ ڊيم ۽ ڪئنالن جي مھم ھلائي رھيا آھن. علي امين گنڊا پور ۽ گورنر سنڌ ڪامران ٽسوري سنڌو درياھ تي حملي آور نہ ٿين. ملڪ جون 3 اسيمبليون ڪالاباغ ڊيم کي رد ڪري چڪيون آھن. پنجاب ۾ موجود آيل ٻوڏ حڪمرانن جي نااهلي ۽ ناڪامي جو نتيجو آھي. ڪالاباغ جو علائقو راوي کان سوين ڪلوميٽر پري آھي. راوي، ستلج ۽ چناب ميداني علائقن جا درياھ آھن، اتي ڪڏھن بہ ڊيم ممڪن ناھي. ڊيم ڪڏھن بہ سيلاب کي روڪي نٿا سگھن، ڊيم وڏن سيلابن جو سبب آھن. ھندستان جڏھن پاڻي روڪڻ ۾ ناڪام ٿي تڏھن ڊيمن جا دروازا کولي ڇڏيا، جنھن ڪري پنجاب ۾ ٻوڏ آئي. جيڪڏھن فرض بہ ڪجي تہ ڪالاباغ ڊيم ٺھيل ھجي ھا تہ ان صورت ۾ بہ لاھور ۽ پنجاب جي ٻوڏن وارن علائقن جو پاڻي ڪالاباغ ڊيم ۾ گڏ ڪرڻ ممڪن نہ ٿئي ھا. وفاق ۽ پنجاب ملڪ جي عوام کي گمراھ ڪرڻ لاء ڊيمن جي مھم من گهڙت مھم شروع ڪئي آھي. سنڌو درياھ دشمن مھم کي فوري طور تي بند ڪيو وڃي. اياز لطيف پليجي چيو تہ سنڌو درياھ جي اندر لڳل زمينداري کي فوري طور ھٽائي درياءَ وھڪرن جي رستا روڪ ڪري درياھن کي قيد نہ ڪيو وڃي. عالمي قانونن جي پاسداري ڪري پاڻي جو سمنڊ تائين ڇوڙ ممڪن بنايو وڃي. ارسا وٽ ڪوڙو رڪارڊ آھي. ٻوڏ وارن ڏينھن کانسواءِ سڄو سال ڪوٽڙي کان ھيٺ سنڌو درياھ ۾ واري پئي اڏامندي آھي. ان باوجود ارسا، واپڊا ۽ وفاقي حڪمران ڪوڙا انگ اکر جاري ڪري سمنڊ ۾ پاڻي ڇوڙ جون دعوائون ڪندا آھن. اياز لطيف پليجي چيو تہ زراعت ملڪ معيشت آھي پر حڪمرانن ھٿ وٺي ملڪ جي معيشت کي تباھ ڪيو آھي. ٻيلا تباھ ڪيو آھن. جنھنڪري ھڪ طرف ماحول جي تباھي ٿي آھي ٻئي طرف ھاري ۽ آبادگارن جو معاشي قتل ٿي رھيو آھي.حڪمرانن وٽ زرعي سڌارن جي ايجنڊا ناھي. زراعت جي بھتري ۽ بحالي جو پروگرام ناھي.