ملير: قاسم ٽيڪسٽائل جي مزدورن جو جبري برطرفين ۽ پگهارون نه وڌائڻ خلاف احتجاج

مزدورن پاران جوڳي موڙ وٽ مل انتظاميه خلاف ڌرڻو هنيو، شهيد ڀٽو جا ڪارڪن به وڏي انگ ۾ شريڪ

ملير (رپورٽ: عبدالرشيد مورجھريو) ملير جي جوڳي موڙ وٽ قائم قاسم ٽيڪسٽائل ۾ مزدورن جبري برطرفين ۽ پگهارون نه وڌائڻ خلاف احتجاجي مظاهرو ڪري ڌرڻو هنيو جنهن م شهيد ڀٽو جي ڪارڪنن پڻ وڏي تعداد م شرڪت ڪئي ۽ سخت نعريبازي ڪئي جنهن سبب سوين مزدورن کي اندر وڃڻ کان روڪيو ويو مزدورن جي اڳواڻن عمران سرڪي, ممتاز ڪلهوڙو, علي گل چانڊيو,مصطفي جلباڻي,رميض ميمڻ جو چوڻ هو ته ڪمپني مزدور دشمن پاليسي اختيار ڪري ڇڏي آهي، پرائيويٽ ماڻهن کي رکڻ سان پورهيتن سان زيادتيون ٿي رهيون آهن، مزدورن کي جبري برطرف ڪيو پيو وڃي ۽ حڪومت پاران مقرر ڪيل گهٽ ۾ گهٽ اجرت به نٿي ڏني وڃي هنن الزام هنيو ته ڪمپني کين پڪو به نٿي ڪري، جڏهن ته پوليس ذريعي گرفتار ڪرڻ، ڪوڙا ڪيس داخل ڪرڻ ۽ ڌمڪيون ڏيڻ جو سلسلو جاري آهي. اڳواڻن انڪشاف ڪيو ته ڪجهه ڏينهن اڳ هڪ مزدور جو تشدد ٿيل لاش هٿ آيو هو، جنهن کي انتظاميا پوليس سان ملي ڀڳت ڪري دٻائڻ جي ڪوشش ڪئي مزدورن جو مطالبو هو ته کين برطرف ڪرڻ جو سلسلو فوري طور ختم ڪيو وڃي، مقرر ڪيل پگهارون ڏنيون وڃن ۽ حقن تي عملدرآمد يقيني بڻايو وڃي.