عمرڪوٽ ضلعي جي ميگھواڙ برداري جو ڪنري جي آڊيٽوريم هال ۾ ميڙاڪو

ميڙاڪي دوران برادري جي مسئلن جي حل ۽ سجاڳي لاءِ مھم ھلائڻ تي اتفاق ڪيو ويو

عمرڪوٽ (رپورٽ:ڪانجي مل رکيسر) عمرڪوٽ ضلعي جي ميگھواڙ برداري جو ميڙاڪو، برادري جي مسئلن جي حل ۽ سجاڳي لاءِ مھم ھلائڻ تي اتفاق ڪيو ويو، تعلقي جي باڊي ۽ ميمبر مقرر ڪيا ويا. خبر موجب عمرڪوٽ ضلعي جي ميگھواڙ برداري پاران ميگھواڙ پنچائت جي سري هيٺ ڪنري جي آڊيٽوريم ھال ۾ ميڙاڪو منعقد ڪيو ويو جنھن ۾ ضلعي جي مختلف علائقن کان ميگھواڙ برادري جي سوين ماڻھن شرڪت ڪئي، “اچو ته نئون جھان جوڙيون” جي سري هيٺ ٿيل ميڙاڪي ۾ برداري جي حال ۽ مستقبل تي روشني وجھي وئي مسئلن جي حل ۽ سجاڳي مھم هلائڻ تي اتفاق ڪيو ويو، ان موقعي تي ميگھــــواڙ پنچائت جي ڪنري باڊي جي باڊي چونڊي وئي، جنھن تحت صدر جيون ساگر، نائب صدر رميش ڪمار، سيينيئر صدر آتم ڪمار مجناڻر، جنرل سيڪريٽري اوم پرڪاش، جوائنٽ سيڪريٽري ديوانند، خزانچي اشوڪ ڪمار، انفارميشن سيڪريٽري نندلال، پريس سيڪريٽري انيل ڪمار مڪواڻا ۽ آفيس سيڪريٽري لاءِ ڀيمون مل کي چونڊيو ويو جڏھن ته 16 رڪني اعزازي ميمبر پڻ چونڊيا ويا، تقريب کي خطاب ڪندي اڳواڻن ضلعي صدر گوتم بيراڻي، رميش پارواڻي، قيمت راءِ، منون مل کوکر، مھاديو ميگھواڙ، اوم پرڪاش، روي شنڪر ۽ ٻين خطاب ڪندي چيو ته اسان جو مقصد ماڻھن جي ڀلائي ۽ گڏيل ترقي آھي، اڳ جي دور کان هن وقت ميگھواڙ برادري هر شعبي ۾ تمام گھڻي ترقي ڪئي آھي، پاڻ ۾ ٻين بردارين جيان هڪ ٿي ھڪٻئي جا ڏک سک جا ساٿي بڻجن ۽ برداري جي اڳتي وڌائي سگهون. هنن چيو ته غريبن کي تعليم ۽ علاج ملي بيمارن ۽ يتيمن جو سهارو بڻجي بيروزگار نوجوانن کي روزگار جا موقعا فراھم ڪرڻ آھي، نشيءَ ۽ فضول رسمن کي ختم ڪري، ڀائيچاري، محبت، ايڪتا ۽ اتحاد کي وڌائي اڳتي وڌنداسين. اڳواڻن وڌيڪ چيو ته تعليم ئي واحد ذريعو آھي جنھن جي وسيلي اسان پنھنجي برداري ۾ شعور، سجاڳي پيدا ڪنداسين، خودڪشي جي وڌندڙ واقعن جي روڪٿام لاءِ جاڳرتا مھم هلائينداسين ۽ ديناوي تعليم سان گڏ مذھبي تعليم به ڏينداسين ۽ نوجوانن ۽ نياڻين جي ڪيريئر ڪائونسلگ ڪري زندگي جي ھر شعبي ۾ پاڻ مڃرائي وڌ کان وڌ ترقي ڪنداسين.