وفاقی وزیر چوہدری سالک حسین کا ورکرز ویلفیئر فنڈ بزنس سینٹر کا افتتاح

اسلام آباد، وفاقی وزیر برائے سمندر پار پاکستانی و انسانی وسائل کی ترقی، جناب چوہدری سالک حسین نے اسلام آباد کے ایف-6 مرکز میں ورکرز ویلفیئر فنڈ (WWF) کے تحت تعمیر کردہ بزنس سینٹر کا باضابطہ افتتاح کیا۔ یہ منصوبہ صنعتی کارکنان کی فلاح و بہبود اور ادارے کے مالی استحکام کے لیے ایک اہم سنگ میل کی حیثیت رکھتا ہے۔ افتتاح کے موقع پر سیکرٹری ورکرز ویلفیئر فنڈ، جناب ذوالفقار احمد نے وفاقی وزیر کا پرتپاک استقبال کیا اور بزنس سینٹر کی تعمیر، مقاصد، افادیت اور مستقبل کے منصوبوں سے متعلق تفصیلی بریفنگ دی۔ افتتاحی تقریب میں اظہار خیال کرتے ہوئے وفاقی وزیر چوہدری سالک حسین نے WWF کی انتظامیہ اور پوری ٹیم کو منصوبے کی کامیاب تکمیل پر مبارکباد پیش کی۔ ان کا کہنا تھا: "یہ منصوبہ اس بات کا ثبوت ہے کہ اگر سرکاری ادارے نیک نیتی، وژن اور مؤثر قیادت کے ساتھ کام کریں تو عوامی خدمت اور مالی خود کفالت دونوں ممکن ہیں۔" انہوں نے اس عزم کا اظہار کیا کہ بزنس سینٹر سے حاصل ہونے والی آمدنی کو مزدوروں اور ان کے اہل خانہ کی تعلیم، صحت، رہائش اور دیگر فلاحی سہولیات پر خرچ کیا جائے گا۔ وفاقی وزیر نے سیکرٹری WWF، جناب ذوالفقار احمد کی قیادت کو سراہتے ہوئے کہا کہ ادارہ ان کی سربراہی میں ترقی کی راہ پر گامزن ہے اور محنت کش طبقے کے لیے نمایاں خدمات انجام دے رہا ہے۔ سیکرٹری ورکرز ویلفیئر فنڈ ذوالفقار احمد نے بریفننگ میں بتایا کہ یہ منصوبہ مکمل شفافیت، اعلیٰ معیار اور مقررہ مدت میں مکمل کیا گیا ہے۔ مزید یہ کہ منصوبے سے حاصل ہونے والی آمدن صرف گیارہ ماہ میں اس کے اخراجات پورے کر لے گی۔ سیکرٹری WWF نے اس عزم کا اظہار کیا کہ موجودہ قیادت اور حکومتی پالیسیوں کے تحت ورکرز ویلفیئر فنڈ 2030 تک ایک منافع بخش ادارہ بن جائے گا، جس کے ثمرات براہِ راست صنعتی مزدوروں اور ان کے اہل خانہ کو حاصل ہوں گے۔ مزید برآں، سیکرٹری نے بتایا کہ WWF حکومت پاکستان کی ہدایات کے مطابق وزارت انفارمیشن ٹیکنالوجی کے اشتراک سے ڈیجیٹلائزیشن کی طرف تیزی سے گامزن ہے۔ اس ضمن میں ایک معاہدہ بھی کیا گیا ہے جس کے تحت مزدور اور ان کے اہلِ خانہ گھر بیٹھے صرف ایک کلک کے ذریعے اپنی درخواستوں کا اسٹیٹس معلوم کر سکیں گے۔ تقریب میں WWF کے سینئر افسران نے شرکت کی۔ تقریب کے اختتام پر وفاقی وزیر نے سیکرٹری WWF اور ورکس سیکشن کے افسران کو ان کی خدمات کے اعتراف میں تعریفی شیلڈز بھی پیش کیں