ٺٽي ضلعي ۾ ملڪ جو وڏو ونڊ ڪاريڊور هجڻ باوجود اتي بجلي جي شديد کوٽ آهي: صادق علي ميمڻ

اسلام آباد/ٺٽو(م ڊ+ شفيق ڀٽي) قومي اسيمبلي جي اجلاس ۾ ٺٽو مان چونڊيل ايم اين اي ۽ پ پ پ ٺٽي ضلعي جي صدر صادق علي ميمڻ پنهنجي خطاب ۾ ملڪ ۽ سنڌ جي اجتماعي مسئلن سان گڏوگڏ ضلعي ٺٽي جي حقن تي زبردست آواز اٿاريو. خطاب دوران صادق علي ميمڻ چيو ته ٺٽي ضلعي ۾ ملڪ جو وڏو ونڊ ڪاريڊور هجڻ باوجود اتي بجلي جي شديد کوٽ، لوڊشيڊنگ، ۽ عوام جي بدحاليءَ بابت ڪو به ڌيان نه پيو ڏنو وڃي. هن وفاقي حڪومت تي تنقيد ڪندي چيو ته ونڊ انرجي ڪمپنيون نه ته مقامي ماڻهن کي روزگار فراهم ڪري رهيون آهن، نه ئي ضلعي ۾ ترقياتي منصوبا شروع ڪري رهيون آهن ۽ نه ئي CSR فنڊ ڏئي رهيون آهن، جيڪو سراسر ناانصافي آهي. ايم اين اي صادق علي ميمڻ چيو ته بلاول ڀٽو زرداري عالمي سطح تي پاڪستان جي حق ۾ راءِ عامه هموار ڪرڻ لاءِ اهم ڪردار ادا ڪري رھيو آهي. ھن وڌيڪَ چيو ته اسان حڪومت جا اتحادي ضرور آهيون، پر سنڌ جو مينڊيٽ به رکون ٿا، هن بجيٽ ۾ سنڌ کي نظرانداز ڪيو ويو آهي. وفاقي حڪومت پنهنجا واعدا پورا نه ڪيا آهن. سنڌ جي يونيورسٽين کي واعدو ڪيل گرانٽ نہ پئي ڏني وڃي. ڪي فور رٿا لاءِ فنڊنگ محدود آهي. سکر موٽر وي لاءِ گھٽ بجيٽ رکي وئي آھي. ھن چيو ته سولر پينلن تان ٽيڪس ختم ڪيو وڃي. گھٽ ۾ گھٽ اجرت ۾ واڌ نه ڪرڻ سراسر زيادتي آهي، ان کي پنجاهه هزار رُپيا مقرر ڪيو وڃي. زراعت لاءِ به بجيٽ ۾ ڪا خاص سهائتا نه ڏني وئي آهي. ھن جو چوڻ ھو ته هن بجيٽ ۾ حاصل ڪيل ٽارگيٽن جو به ڪو ذڪر ٿيل نه آهي جيڪا سٺي روايت ناھي. صادق علي ميمڻ خبردار ڪيو ته جيڪڏهن حڪومت سنڌ جي مسئلن ۽ اعتراضن تي ڌيان نه ڏنو ته پ پ پ بجيٽ جي منظوري ۾ سهڪار نه ڪندي. واضح رهي ته ضلعي ٺٽو ۾ ملڪ جي وڏي ونڊ انرجی پيدا ڪندڙ علائقن مان هجڻ باوجود، مقامي عوام بنيادي سهولتن، روزگار، بجلي ۽ ترقي کان محروم آهي،