ملير: شاھ لطيف ٽائون ڀرسان ٽيڪسٽائل ڪمپني جي پورهيتن جو مطالبن جي مڃتا لاءِ ڌرڻو، پوليس جي هوائي فائرنگ

پوليس پهچي مظاهرين تي هوائي فائرنگ ڪري ڏني، احتجاج ۾ شريڪ عورتن ۾ رڙيون پئجي ويون

ملير (رپورٽ: عبدالرشيد مورجھريو) شاھ لطيف ٽائون ڀرسان منزل پمپ وٽ واقع خانگي ٽيڪسٽائل ڪمپني جي پورهيتن پاران پگهارن ۾ ڪٽوتي، ٺيڪيداري نظام ذريعي جبري برطرفين ۽ مقامي ماڻهن کي روزگار نه ڏيڻ خلاف احتجاجي مظاهرو ڪيو ويو. احتجاج ڪندڙ پورهيتن ڪمپني جو مک دروازو بند ڪري ڇڏيو، جنهن سبب ڪم بند ٿي ويو.احتجاج جي اطلاع تي پوليس پهچي هوائي فائرنگ ڪري ڏني جنهن سبب احتجاج ۾ شامل عورتن ۾ خوف و هراس پکڙجي ويو احتجاج ڪندڙ پورهيتن ڪمپني انتظاميا خلاف سخت نعريبازي ڪندي چيو ته ٺيڪيدار نظام ذريعي مزدورن سان ظلم ڪيو پيو وڃي، اجرتون گهٽ ڪيون پيون وڃن ۽ بغير ڪنهن نوٽيس جي ملازمن کي نوڪرين تان هٽايو پيو وڃي.مزدورن الزام هنيو ته مقامي ماڻهن لاءِ روزگار جا در بند ڪيا ويا آهن، جنهن سبب بيروزگاري وڌي وئي آهي. احتجاج ڪندڙن جو چوڻ هو ته ڪمپني جي گارڊن پاران هوائي فائرنگ ڪري دهشت جو ماحول پيدا ڪيو ويو، جڏهن ته انتظاميا پوليس گهرائي، احتجاج ڪندڙن تي ڪيس داخل ڪرڻ جي سازش ڪئي پئي وڃي. احتجاج ڪندڙ اعلان ڪيو ته جيستائين انهن جا جائز مطالبا تسليم نه ڪيا وڃن ٿا، تيستائين احتجاج جاري رهندو، ۽ ظلم خلاف آواز اٿاريندا رهنداسين.