جسقم ملير پاران مرڪزي وائيس چيئرمين رمضان ڪلوڙ جي گرفتاري خلاف احتجاج
مختيار سومرو، مشتاق زهراڻي، عامر سنڌي، ممتاز مري ۽ اشرف لاشاري جي اڳواڻي ۾ احتجاج ڪيو ويو
ملير (رپورٽ: عبدالرشيد مورجھريو)جسقم ملير جي اڳواڻن ضلعي صدر مختيار سومرو، جنرل سيڪريٽري مشتاق زهراڻي، عامر سنڌي، ممتاز مري ۽ اشرف لاشاري جي اڳواڻي ۾ جسقم جي مرڪزي وائيس چيئرمين رمضان ڪلوڙ جي گرفتاري خلاف رزاق آباد جي مک چوڪ کان عوامي پريس ڪلب ملير تائين احتجاجي ريلي ڪڍي وئي، جنهن ۾ ڪارڪنن وڏي انگ ۾ شرڪت ڪئي.ريلي دوران شرڪت ڪندڙن سخت نعريبازي ڪندي رمضان ڪلوڙ جي فوري آزادي جو مطالبو ڪيو ۽ سندس گرفتاري کي سياسي انتقام قرار ڏنو.مظاهري کي خطاب ڪندي اڳواڻن چيو ته جسقم جي قيادت ۽ ڪارڪنن کي غيرقانوني طور تي گرفتار ڪري آواز کي دٻائڻ جي ڪوشش ڪئي پئي وڃي، جيڪا ڪنهن به صورت ۾ قبول نه ڪئي ويندي. هنن چيو ته پرامن سياسي جدوجهد هر شهري جو آئيني حق آهي، پر حڪومت ۽ لاڳاپيل ادارا پرامن سياسي ڪارڪنن خلاف ڪارروايون ڪري رهيا آهن.هنن وڌيڪ چيو ته رمضان ڪلوڙ جي گرفتاري غيرقانوني ۽ غيرمنصفاڻي آهي، کيس بنا دير آزاد ڪيو وڃي، ٻي صورت ۾ احتجاج جو دائرو وڌايو ويندو.اڳواڻن خبردار ڪيو ته جيڪڏهن جسقم جي ڪارڪنن خلاف ڪيس ختم نه ڪيا ويا ۽ گرفتار اڳواڻ آزاد نه ڪيا ويا ته ملير سميت سڄي سنڌ ۾ احتجاجي تحريڪ تيز ڪئي ويندي.ريلي جي آخر ۾ شرڪت ڪندڙن پرامن طور تي احتجاج ختم ڪيو، جڏهن ته اڳواڻن اعلان ڪيو ته ايندڙ حڪمت عملي لاءِ مشاورت جاري آهي۔