ایم کیو ایم اگر کراچی کو وفاق کے حوالے کرنا چاہتی ہے تو قومی اسمبلی میں قرارداد لائے: سندھ حکومت کی ترجمان

کراچی: سندھ حکومت کی ترجمان سعدیہ جاوید نے کہا ہے کہ اگر ایم کیو ایم کراچی کو وفاق کے حوالے کرنا چاہتی ہے تو اس کے لیے قومی اسمبلی میں قرارداد لائے۔ نجی ٹی وی چینل کے ایک پروگرام میں گفتگو کرتے ہوئے سعدیہ جاوید نے کہا کہ گل پلازا سانحے پر اگر جوڈیشل کمیشن کی ضرورت پیش آئی تو ضرور قائم کیا جائے گا، تاہم بلیک میلنگ کے ذریعے جوڈیشل کمیشن نہیں بنایا جائے گا۔ یہ ضروری نہیں کہ اپوزیشن کی ہر خواہش پوری کی جائے۔ انہوں نے کہا کہ اگر ایم کیو ایم چاہتی ہے کہ کراچی کو وفاق کے حوالے کیا جائے تو قومی اسمبلی میں اس حوالے سے قرارداد پیش کرے۔ انہوں نے ایم کیو ایم سے سوال کیا کہ جب بلدیہ فیکٹری میں آگ لگی تھی تو اس وقت ہمیں بھی شکوک تھے، اور اس واقعے میں ایم کیو ایم پر الزامات عائد کیے گئے تھے۔