ٺٽي جي ڪوھستاني ڳوٺ جان محمد برفت واسين جو سوين ايڪڙ زمينن تي مبينا قبضي خلاف احتجاج

ٺٽو (ڊ ر) ٺٽي جي ڪوھستاني ڳوٺ جان محمد برفت جي رھواسين جي سوين ايڪڙ زمينن تي بااثر ماڻھن پاران ٿيل قبضا خالي ٿي نہ سگھيا، متاثر ڪيترن ئي رھواسين پاران سندن زمينن تي بااثر ماڻھن پاران قبضا ڪري پنھنجا ھٿياربند ماڻھون ويھاري مقامي ماڻھن جا رستا ۽ لنگھ بند ڪري کين بلاجواز خوفزدہ ڪري کين پنھنجي ئي ملڪيتن مان بيدخل ڪرڻ واري عمل خلاف متاثر ڳوٺاڻن مير محمد برفت، محمد عمر برفت، سائين بخش برفت، بچندو برفت، عرس، لونگ، علي بخش، علي خان، جمع، عمر، مٺو، اشرف، محمد عيسيٰ، ميرخان، چنگيز، حاجي، يوسف برفت دانھيندي الزام ھڻندي چيو آھي تہ سندن ڪوھستاني روڌ مڪان ۽ کاکڙ مڪان ۾ سوين ايڪڙ ڪاعذن واريون اباڻيون زمينون آھن، جن تي رات وچ ۾ ھڪ بااثر شخص مير لکي زبردستي قبضو ڪري پنھنجا ھٿياربند ماڻھون ويھاري ڇڏيا آھن، جن سندن رستا بند ڪري کين خوفزدہ ڪري پوليس معرفت سخت پريشان ڪري نقصان جون ڌمڪيون پيا ڏين، جن مان کين نقصان جو انديشو آھي، ھنن چيو تہ ھنن ايس ايس پي ٺٽو، ايس ايس پي ڄامشورو، ڊي سي ٺٽو، چونڊيل نمائندن سميت سمورن لاڳاپيل کاتن جي عملدارن کي لکت ۾ درخواستون ۽ دانھون ڏيڻ سميت احتجاج ڪيا آھن، پر سندن ڪير بہ داد فرياد ڪرڻ وارو ناھي، بااثر قبضاگير شخص کين ڪوڙن ڪيسن ۾ ڦاسائي سندن ملڪيتون ڦٻائڻ چاھي ٿو، جنھن ڪري مقامي رھواسي خوف ۾ ورتل آھن. ھنن چيف جسٽس سنڌ ھاء ڪورٽ، وزير اعلي سنڌ سميت سمورن وس وارن کان مطالبو ڪيو تہ ساڻن انصاف ڪري سندن زمينن تي ٿيل قبضو خالي ڪرائي زمين سندن حوالي ڪري قبضاگيرن ۽ انھن جي ساٿي ھٿياربند ماڻھن خلاف ڪاروائي ڪري کين تحفّظ مھيا ڪيو وڃي، ٻئي صورت ۾ سخت احتجاج ڪرڻ سان گڏ انصاف لاء عدالت جو در کڙڪائينداسين.