اي ڊي سي نوشهروفيروز لياقت علي بلوچ جي صدارت هيٺ ضلعي ويجيلنس ڪميٽي اجلاس ٿي گذريو
نوشهروفيروز (ڊ ر)ايڊيشنل ڊپٽي ڪمشنر نوشهروفيروز لياقت علي بلوچ جي صدارت هيٺ ضلعي ويجيلنس ڪميٽي جو اجلاس ٿيو جنهن ۾ لاڳاپيل کاتن جي آفيسرن، چيئرمين ميونسپل ڪميٽي نوشهروفيروز ڊاڪٽر ڪاشف ميمڻ، ميونسپل ڪميٽي مورو ۽ ٻين ٽائون ڪاميٽين جي نمائندن شرڪت ڪئي. اجلاس کي خطاب ڪندي ايڊيشنل ڊپٽي ڪمشنر نوشهروفيروز لياقت علي بلوچ چيو ته ضلعي مان چائلڊ ليبر جي خاتمي لاءِ مڪاني ادارن جا چونڊيل نمائندا ضلعي انتظاميا سان سهڪار ڪن ۽ ان جي تعليم ۽ تربيت دوران جبري مزدوري جي خاتمي لاءِ قدم کنيا وڃن هن وڌيڪ چيو ته ميونسپل ۽ ٽائون ڪميٽين پاران اسڪول کان ٻاهر ٻارن کي ٻيهر اسڪول ۾ داخل ڪرائڻ لاءِ مهم شروع ڪئي وڃي. ايڊيشنل ڊپٽي ڪمشنر ضلعي جي ٽيڪنيڪل تعليمي ادارن ۾ ٻارن جي بهتر تعليم ۽ تربيت لاءِ گڏيل ڪوششن جي ضرورت تي زور ڏنو ۽ چونڊيل نمائندن کي پڻ صلاح ڏني ته هو راندين جا مقابلا ڪرائڻ ۽ نوجوانن لاءِ هاڪاري سرگرمين کي هٿي وٺرائن. ان موقعي تي ميونسپل ڪميٽي مورو ۽ نوشهروفيروز کان علاوه سمورن ٽائون ڪميٽين جي چيئرمينن ڀرپور تعاون جو يقين ڏياريو ۽ چائلڊ ليبر جي خاتمي لاءِ پنهنجون تجويزون پڻ پيش ڪيون.