17تاريخ تي پيپلز پارٽي جي اميدوار کي ڏينهن جا تارا ڏيکارينداسين: لال مالهي جو ڌماڪيدار اعلان

عمرڪوٽ ۾ سياسي گرما گرمي عروج تي، درياءَ بچايو تحريڪ جو وڏو جلسو اڄ ٿيندو, جونيئر ذوالفقار کي به شرڪت جي دعوت

عمرڪوٽ (رپورٽ:ڪانجي مل رکيسر) عمرڪوٽ ۾ سياسي منظرنامو تيزيءَ سان گرم ٿيندو پيو وڃي، درياءَ بچايو تحريڪ ۽ گڏيل پارٽين پاران اڄ 15 اپريل تي هڪ وڏي سياسي جلسي جو اعلان ڪيو ويو آهي، جنهن ۾ جي ڊي اي، قومي عوامي تحريڪ، ايس يو پي، جماعت اسلامي، جي يو آءِ سميت ٻين جماعتن جا مرڪزي اڳواڻ ۽ عهديدار شرڪت ڪندا، پريس ڪلب عمرڪوٽ ۾ ٿيل هڪ هجوم ڀريو پريس ڪانفرنس ۾ گڏيل جماعتن جو اميدوار اميدوار لال مالهي، ايڊووڪيٽ ڀڳوان داس ڀيل، ايس يو پي جو گل بجير، فنڪشنل ليگ جو اڳواڻ لياقت جوڻيجو، غلام نبي منڱريو سميت ڪيترائي اڳواڻ شامل هئا، ان موقعي تي لال مالهي جوش ڀري انداز ۾ خطاب ڪندي چيو ته 17 تاريخ تي پيپلز پارٽي جي اميدوار کي ڏينهن جو تارا ڏيکارينداسين، هنن جي غنڊا گردي هاڻ ختم ٿي رهي آهي، جيڪڏهن اليڪشن ۾ ڌانڌلي ٿي ته پورو ڌرڻو هڻبو، عوامي راءِ کي پرائيويٽ ماڻهن جي مرضي مطابق سليڪشن ۾ تبديل ٿيڻ نه ڏينداسين، هن نوجوان اڳواڻ جونيئر ذوالفقار علي ڀٽو کي به جلسي ۾ شرڪت جي دعوت ڏيندي چيو ته "خوش آمديد!"، ۽ پيپلزپارٽي جي ڪارڪنن ۽ اڳواڻن کان مخاطب ٿيندي چيو ته بدزباني بدران عوام کي منهن ڏيو، ۽ اليڪشن کان اڳ روئڻ بند ڪريو، لال مالهي واضع طور چيو ته اليڪشن ڪميشن پاڻ ڌانڌلي جي امڪانن کان واقف آهي، ان لاءِ ئي رينجرز جي مقرري جو حڪم ڏنو ويو آهي، اڄ جي جلسي ۾ اهم سياسي اڳواڻن سيد صدرالدين شاهه، سيد زين شاهه، صفدر عباسي، راجا ڪامران، حليم عادل شيخ، خضر حيات منڱريو ۽ ٻين اهم شخصيتن جي شرڪت متوقع آهي، جنهن ڪري هي جلسو هڪ تاريخي سياسي اجتماع جي صورت اختيار ڪندو، عمرڪوٽ ۾ اڄ سياسي لهرون تيز ٿي ويون آهن، ۽ عوام جون نظرون هن جلسي تي لڳل آهن ته ڇا هي جلسو ايندڙ اليڪشن جي رخ جو تعين ڪندو؟ هي سوال هاڻ هر زبان تي آهي۔