نوشهروفيروز ۾ ڊاڪٽر آڪاش انصاري ۽ ڊاڪٽر ذوالفقار سيال جي ياد ۾ تعزيتي ميڙاڪو

ڊاڪٽر آڪاش انصاري سنڌ جو مھان شاعر ۽ ليکڪ ھو، جنھن شاعريءَ ۾ ڌرتيءَ جي حب، ماروئڙن جو ڏک درد ۽ سنڌ سان عشق سمايل آھي: مقرر

نوشھرو فيروز (ڊر)سنڌ جي قومي مزاحمتي شاعر ڊاڪٽر آڪاش انصاريءَ ۽ سنڌي ادبي سنگت جي اڳوڻي سيڪريٽري جنرل ڊاڪٽر ذوالفقار سيال جي ياد ۾ تعذيتي ميڙاڪو سنڌي ادبي سنگت شاخ بچل مھر ۽ شاخ نوشھرو فيروز پاران ضلعه رابطه سيڪريٽري ايم ظفر تڳر جي ميزبانيءَ ھيٺ ٿيو. ھن ميڙاڪي جي صدارت سنڌي ادبي سنگت شاخ ڏيپارجا جي سيڪريٽري محبتي ملاح ڪئي. ان موقعي تي ڳالھائيندي مقررن امجد ميمڻ، جبار ملاح، غفار عباسي، يونس راڄپر، علي نواز سولنگي، نور محمد ناز، شاھد راڄپر، بشير حسيني، خادم سيال، محرم چنو، سھيل منگي ۽ ٻين چيو ته، ڏاڪٽر آڪاش انصاري سنڌ جو مھان شاعر ۽ ليکڪ ھو، جنھن شاعريءَ ۾ ڌرتيءَ جي حب، ماروئڙن جو ڏک درد ۽ سنڌ سان عشق سمايل آھي، سندس شھادت سان اڃان تائين سنڌ سوڳوار آھي. سندس وڇوڙي جو ڏک پوري سنڌ ۾ آھي. ھنن چيو ته ڊاڪٽر ذوالفقار سيال علم ادب ۽ خاص ڪري ٻاراڻي ادب جي شاعريءَ جو وڏو خزانو ڏنو آھي. سندس وڇوڙو به وڏو نقصان آھي. اھڙن قومي ھيرن جي وڇوڙي تي، اسان کين ياد ڪري پنھنجو فرض نڀايو آھي. ان موقعي تي صدارتي تقرير کان علاوه ايم ظفر تڳر ۽ محرم چنه ڊاڪٽر آڪاش انصاريءَ جي ۽ پنھنجي شاعري پڻ جھونگاري پروگرام ۾ پپن ڀيرائي، عبدالرزاق خاصخيلي، محمد عادل عباسي، شاھد خانزادو، عتيق الحمٰن وسطڙو، رضا محمد چنو، عبدالحميد چنو، محمد حسنين سميت ٻين پڻ شرڪت ڪئي.