ڏوڪري ويجهو پورهيت کان ڦر، جوابدارن جي گرفتاري لاءِ متاثرن جواحتجاج

هٿياربند موٽرسائيڪل، 16 هزار رپيا، 2 بوسڪي جون ڊريسون ۽ ٻيو سامان ڦري ويا: اظهر جوڻيجو

ڏوڪري (رپورٽر) ڏوڪري ڀرسان ايئرپورٽ ٿاڻي جي حد گهانگهرڪو پوليس چونڪي وٽان ون ٽو فائيو تي پويان آيل ٽن نامعلوم ڦورن پورهيت اظهر علي جوڻيجو کان سي ڊي موٽر سائيڪل ماڊل 2021 روڪ رقم سورنهن هزار، ٻہ اصل بوسڪي جون ڊريسون ۽ ٻيو قيمتي سامان ڦر ڪري فرار ٿي ويا، اهڙو اطلاع ايئرپورٽ ٿاڻي تي ڏنو ويو آهي، ساڳي هنڌ ڦرجي ويل اظهر علي جوڻيجو سندس پيء حافظ نظر محمد جوڻيجو غلام ياسين جوڻيجو ۽ ٻين جي اڳواڻي ۾ احتجاجي مظاهرو ڪيو ويو، قريل سامان واپس ڪرائي ڏيڻ جو مطالبو، ان موقعي تي اظهر علي جوڻيجو، صحافين کي تفصيل ڏيندي ٻڌايو تہ مان صبح جو ڏوڪري پنهنجي درزڪي دوڪان تي ڪم لاء اچي رهيو هيس تہ گهانگهرڪي پوليس چئوڪي وٽان ون ٽو فائيو تي آيل ٽن نامعلوم ڦورن مونکي راڌڻ وايا ڏوڪري روڊ تي بيهاري سي ڊي موٽر سائيڪل ماڊل 2021، ٻہ عدد اصل بوسڪي جون اڻ سبيل ڊريسون، سورنهن هزار روڪ رقم ۽ ٻيو قيمتي سامان ڦر ڪري فرار ٿي ويا آهن، هن چيو مونکي ڦرڻ دوران مار ڪٽ بہ ڪئي، جنهن جو اطلاع ايئرپورٽ ٿاڻي تي ڏنو ويو آهي، هوڏانهن سندس پيء نظر محمد جوڻيجو ۽ غلام ياسين جوڻيجو چيو تہ ڏوڪري تعلقي جا سڀ روڊ رستا ڏوهارين جي ميراث بڻجي ويا آهن، جنهن ڪري امن امان جي صورتحال وڌندي پئي وڃي جڏهن تہ علائقا نوگو ايريا بڻجندا پيا وڃن، هنن ايس ايس پي لاڙڪاڻو ڊي ايس پي ڏوڪري سميت ايس ايڇ او ايئرپورٽ کان مطالبو ڪيو تہ پورهيت اظهر علي جوڻيجو کان ڦر ٿيل سامان ۽ روڪ رقم واپس ڪرائي ڏنو وڃي.