ٺٽو: ريلوي اسٽيشن ميٽينگ لڳ ٽريڪ ويجهو ڪوئلي جي خطرناڪ کوٽائي جاري

ڪوئلي جي کوٽائي سبب ريلوي ٽريڪ کي نقصان پھچڻ جو خطرو، اعليٰ اختيارين نوٽيس نه ورتو

ٺٽو(شفيق ڀٽي) ٺٽي ضلعي جي اخري حد واري ريلوي اسٽيشن ميٽينگ لڳ ريلوي ٽريڪ ويجهو ڪوئلي جي خطرناڪ کوٽائي جاري آھي، جنھن ڪري ريلوي ٽريڪ کي نقصان پھچڻ جو انديشو وڌي ويو آھي، پر اڃان تائين پاڪستان ريلوي جي اعليٰ اختيارين ھن جو ڪوبہ نوٽيس ناھي ورتو، ان سلسلي ۾ ڪوھستان جي سماجي اڳواڻ محمد بخش بروھي ۽ ٻين چيو آھي تہ ڪوھستاني پٽي معدنيات سان مالا مال آھي، جتي ڪوئلي جي کاڻين مان ڪوئلو ڪڍڻ جو سلسلو پڻ جاري اھي، محمد بخش بروھي ۽ ٻين انڪشاف ڪندي چيو آھي تہ تعلقي ٺٽي جي ريلوي اسٽيشن ميٽنگ جي ويجھي وارن علائقن ۾ ريلوي ٽريڪ جي بلڪل ويجھو بااثر ٺيڪيدارن پاران غير قانوني ۽ خطرناڪ ڪوئلي جي کوٽائي تيزي سان جاري ڪري ڇڏي آهي، جنهن سبب زمين دٻجڻ سان گڏ ريلوي ٽريڪ کي سخت خطرو لاحق ٿي ويو آهي. جنھن تي مڪاني ماڻهن سخت ڳڻتي ظاهر ڪندي چيو آھي ته جيڪڏهن فوري قدم نه کنيا ويا ته وڏو حادثو پيش اچي سگهي ٿو، ڇاڪاڻ جو ريلوي ٽريڪ جا بنياد ڪمزور ٿيندا پيا وڃن. ھنن چيو تہ ڪوئلي جون کاڻيون ريلوي لائين جي بلڪل ويجھو آهن ۽ ڪٿي ڪٿي ته ٽريڪ جي هيٺان به وڃي رهيون آهن، جنهن سبب زمين اندر کان خالي ٿي رهي آهي. سماجي اڳواڻ محمد بخش بروھي وڌيڪ چيو تـہ اسان روز ڏسون ٿا ته زمين ويهڻ شروع ٿيڻ ڪري ريلوي ٽريڪ جو بنياد ڪمزور ٿيندو پيو وڃي، ان صورتحال ۾ جيڪڏهن ٽرين تيز رفتاري سبب گذري ٿي تہ زمين ويھڻ ڪري وڏو حادثو پيش اچي سگھي ٿو، ھنن چيو تہ هن مسئلي بابت ڪيترائي ڀيرا لاڳاپيل اختيارين کي اطلاع ڏنو ويو آھي، پر انتظاميہ ڪوبه قدم کڻڻ لاء تياي ناھي، هنن چيو سندن علائقي ۾ جيڪا ڪوئلي ڪڍڻ لاء کوٽائي ٿي رھي آھي، اھا غير قانوني طريقي سان ٿي رهي آهي، جنھن ۾ ڪوبہ حفاظتي بندوبست ٿيل ناھي، جنھن ڪري مڪاني رهاڪن توڙي ريل گاڏين ۾ سفر ڪندڙ ماڻھن جي زندگين کي خطرو آهي. جيڪڏهن فوري طور تي هنن سرگرمين کي نه روڪيو ويو ته اهو ڪنهن وڏي سانحي جو سبب بڻجي سگهي ٿو. هنن حڪومت ۽ ريلوي کاتي جي اعليٰ اختيارين کان مطالبو ڪيو ته فورن ڪوئلي جي غير قانوني کوٽائي کي بند ڪري ريلوي ٽريڪ کي محفوظ بڻايو وڃي. ياد رھي تہ ھن کان اڳ بہ ڪوئلي جي کاڻين ۾ سھولتون نہ ھجڻ ڪري ڪيترائي پورھيت فوت ٿيڻ سميت معذور بڻجي ويا اھن، جن جي بہ ڪير مالڪي ڪرڻ يا انھن جي خاندانن جي سارسنڀال لھڻ وارو ناھي، ان ڪري پاڪستان ريلوي توڙي ٻين اختيارين کي گھرجي تہ ھن طرف ڌيان ڏيئي ريلوي ٽريڪ کي امڪاني نقصان کان بچائي ريلوي لائين کان پري ڪوئلي جي کوٽائي قانوني طريقي سان ڪري ڪم ڪندڙ پورھيتن کي گھربل سموريون سھولتون مھيا ڪيون وڃن، جيئن پورھيت بہ محفوظ رھي سگھن.