مانجهند ڀرسان روڊ حادثي ۾ باقراڻي واسي ٻن ڀائرن ۽ سندن ڀيڻيوي سميت 4 ڄڻا اجل جو شڪار، لاش گهر پهچڻ تي ڪهرام

فوتين ۾ محمد وارث جتوئي، سندس ڀاءُ شوڪت، ڀيڻيوو عيدن جتوئي ۽ سندن ڊرائيور عزيز احمد جتوئي شامل

باقراڻي: مانجهند ڀرسان انڊس هاءِ وي تي ڪوچ ۽ ڪار وچ ۾ ٽڪر جي نتيجي ۾ فوت ٿيل باقراڻي تعلقي جي ڳوٺ سونو جتوئي ۽ ڳوٺ فيض محمد جتوئي جي 4 فوتين جا مڙهه حيدرآباد کان ڳوٺ پهچايا ويا ، ٻن ڀائرن محمد وارث جتوئي ، شوڪت علي جتوئي ولد ديدار جتوئي ۽ سندن ڀيڻوي رٽائرڊ فوجي عيدن جتوئي ، ڪار ڊرائيور عزيز احمد جتوئي سميت چئن ئي فوتين جا مڙهه ڳوٺ پهچڻ تي گهرن ۾ قهرام مچي ويو ، قيامت صغرا جو منظر ، هر اک آلي هئي ، سندن وارث پنهنجين پيارن جي لاشن کي چنبڙي اڀ ڏاريندڙ دانهون ڪيون ، ٻڌايو پيو وڃي ته دبئي مان واپس ايندڙ پنهنجي ڀاءُ منور علي جتوئي کي سندس فوتي ڀائر ڪراچي ايئرپورٽ تان ڳوٺ وٺي اچي رهيا هئا ته سندن ڪار سان حادثو پيش آيو ، جنهن ۾ ٻه ڀائر محمد وارث جتوئي ، شوڪت علي جتوئي ولد ديدار جتوئي ۽ سندن ڀيڻويو ڳوٺ فيض محمد جتوئي واسي رٽائرڊ فوجي عيدن جتوئي ، ڪار ڊرائيور عزيز احمد جتوئي سميت چار ڄڻا فوت ٿي ويا ، جڏهن ته دبئي مان ايندڙ سندن ڀاءُ منور علي جتوئي ۽ سندن ڀاڻج فوجي جوان نور نبي جتوئي سخت زخمي ٿي پيا ، جنهن کي علاج لاءِ حيدرآباد اسپتال منتقل ڪيو ويو آهي .