جماعت اسلامي جي اعليٰ سطحي وفد جي اياز لطيف پليجي سان ملاقات، اي پي سي ۾ شرڪت جي دعويٰ

ملاقات دوران 12 جنوري تي سکر ۾ رٿيل آل پارٽيز ڪانفرنس ۾ شرڪت جي دعوت، سياسي صورتحال تي به ڳالهيون ڪيون ويون

حيدرآباد(بيورو) قومي عوامي تحريڪ جي سربراھ اياز لطيف پليجو سان جماعت اسلامي جي سينيئر اڳواڻ مولانا اسدالله ڀٽو، محمد حسين محنتي، مولانا وحيد قريشي، حافظ طاھر مجيد، مجاهد چنا جي اڳواڻي ۾ اعلي سطحي وفد سندس رھائشگاھ المصطفي ٽائون قاسم آباد پھچي ملاقات ڪري 12 جنوري تي بدامني ۽ ڌاڙيل خلاف سکر آل پارٽيز ڪانفرنس ۾ شرڪت جي دعوت ڏني. ملاقات ۾ سنڌ ۽ ملڪ جي صورتحال تي تفصيلي ڳالھ ٻولھ ڪئي وئي. ان موقعي تي اياز لطيف پليجي چيو تہ سنڌ ۾ ڌاڙيل راڄ آھي. سکر ۽ لاڙڪاڻو ڊويزن جا لکين ماڻھو يرغمال آھن. حڪومت جا وزير ڏوھن ۽ منشيات جي سرپرستي ڪري رھيا آھن. گرين انيشيٽو سنڌ کي بنجر ۽ ڀڙڀانگ بنائڻ جو منصوبو آھي. آصف زرداري ايوان صدر ۾ ويھي سنڌ جي پاڻي ۽ زمينن تي ڌاڙا ھڻائي رھيو آھي. اقتدار لاءِ سنڌ جا وسيلا نيلام ڪيا پيا وڃن. جماعت اسلامي جي سينيئر اڳواڻ مولانا اسدالله ڀٽو چيو تہ ڌاڙيل راڄ جي ڪري ماڻھو لڏپلاڻ تي مجبور آھن. سنڌ حڪومت جي ناڪام ۽ ناقص پاليسين جي ڪري بدامني جي باھ ٻري رھي آھي. اتر سنڌ جي ضلعن ۾ اغوا، ڌاڙن ۽ قتل غارت گيري جي ڪري عوام جو جيئڻ جنجال آھي. سنڌ حڪومت امن بحال نٿي ڪرائي سگھي. جماعت اسلامي امن امان جي صورتحال جي بھتري لاءِ گڏيل حڪمت عملي جوڙڻ لاءِ 12 جنوري تي سکر ۾ آل پارٽيز ڪانفرنس ڪري رھي آھي، جنھن ۾ سمورين جماعتن کي دعوت ڏني وئي آھي. اياز لطيف پليجي چيو تہ بدامني، سنڌو تي ڌاڙن ۽ بيڊگورننس خلاف قومي عوامي تحريڪ جدوجھد جي ميدان تي آھين جماعت اسلامي جي اي پي سي وقتائتو قدم آھن، اي پي سي جي ڀرپور حمايت ڪريون ٿا.